भांगरभूंय | प्रतिनिधी
प्रयागराज, खबरां संस्था: महाकुंभ मेळ्यांत जावपी गर्दी लक्षांत घेवन एका मनशान हे गर्देचो वापर गुन्यांव करपा खातीर करून घेतलो. प्रयागराजच्या एका हॉटेलांत बायलेचो खून करून ती महाकुंभमेळ्यांत शेणिल्ल्याचें नाटक ताणें केलें. मात, ताच्या पुतान हाचेर विस्वास दवरिनासतना सोद मोहीम सुरू केली आनी ताका बापायचें खरें रूप कळ्ळें.
दिल्लीक रावपी अशोक वाल्मिकी आनी ताची बायल मिनाक्षी प्रयागराज महाकुंभमेळ्यांत पवीत्र स्नान करपा खातीर गेल्लीं. तांणी त्रिवेणी संगमांत फोटो काडून ते सोशल मीडियाचेर अपलोडूय केले. उपरांत हें जोडपें एका लॉजांत रावपाक गेलें. दुसर्या दिसा परत न्हावपाक वचुंया अशें ताणें तिका सांगलें. मात दुसर्या दिसाची सकाळ उजवाडचे पयलींच अशोकान मिनाक्षीचो खून केलो. वॉशरुमांत धारेच्या शस्त्रान तिचो खून करून तो थंयच्यान पळून गेलो. उपरांत ताणें पुताक फोन करून ती महाकुंभ मेळाचे गर्देंत सांडली अशें सांगलें.
मजगतीं, पुलिसांक लॉजांत हे बायलेची कूड सांपडली. चवकशी काडपाचो पुलिसां मुखार एक व्हड प्रस्न निर्माण जाल्लो. कारण, ह्या लॉज धनयान ह्या जोडप्या कडल्यान वळखपत्र घेवंक नाशिल्लें. तशेंच फकत ५०० रुपयांत रूम दिल्लो. वळखपत्रा बगर आरोपी मेरेन पावप पुलिसां मुखार आव्हान आशिल्लें.
पुलीस आरोपीं मेरेन कशे पावले?
दुसरे कडेन आवयच्या सोदा खातीर तिचो पूत प्रयागराज पावलो. महाकुंभमेळ्यांत आयले उपरांत ताणें थंय आवयचो सोद घेतलो. शेणिल्ले आवयक सोदपा खातीर तांणी पुलिसांची मजत घेतली. पुलिसांक आईचो फोटो दाखयले उपरांत तांणी ताका प्रयागराजच्या मोर्गांत व्हेलो. थंय ताणें आवयची कूड वळखली. ह्याच काळांत पुलिसांनी ताका बापायक फोन करपाक सांगलें. ते प्रमाण वाठारांतल्या सीसीटीव्ही फुटेजीचे मजतीन पुलिसांनी आरोपी अशोक वाल्मिकी हाका सोदून काडलो.
खून कित्याक केलो?
अशोकाचे भायर प्रेमसंबंद आशिल्ले. ह्या कारणाक लागून दोगांय घोव-बायले मदीं सदांच झगडें पेट्टालें. हाका लागून अशोक बायलेचेर वाजेल्लो. हाका लागून तांणें तिचो कांटो काडपाचें थारायलें. ह्या गुन्यांवांत आडकुचा न्हय म्हणून ताणें मुद्दम वळखपत्र विचारचे ना अशें लॉज सोदून काडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
