भांगरभूंय | प्रतिनिधी
हैदराबाद, खबरां संस्था : तेलंगणांतल्या हैदराबादच्या सिद्दीपेठांत धक्को दिवपी घडणूक घडल्या. बायलेक कसलीच कल्पना दिनासतना घोवान लिंग बदलपाची शस्त्रक्रिया केली. घोवान बायलेक आपूण ट्रान्सवुमन आसा अशें सांगिना फुडें तिका धक्को बसलो. इतली व्हडली गजाल आपले कडल्यान लिपोवन दवरल्ले खातीर बायलेन प्लॅन करून आपल्या घोवाचो खून केलो. ह्या प्रकरणांत ते बायले सयत ३ जाणांक पुलिसांनी अटक केल्या उपरांत ही केस उजवाडाक आयली. म्हयन्या उपरांत पुलिसांनी ही केस सोडयली.
तो साडी न्हेसपाक बायलेच्या ऑफिसात वतालो
त्या दोगांयचे २०१४ वर्सा लग्न जाल्लें. २०१५ वर्सा त्या दोगांयकूय एक चली जाली. बायलेन कुळारच्यान आनीक हुंडो हाडचो म्हणून घोव तिका छळटालो. अचकीत बायलेक कसलेच तरेची कल्पना दिनासतना ह्या व्यक्तीन लिंगबदल शस्त्रक्रीया (सेक्स चेंज ऑपरेशन) करून घेतलें आनी तो साडी न्हेसपाक लागलो, अशें पुलिसांनी सांगलें.
लिंग बदल शस्त्रक्रिया केले उपरांतूय तो तिला छळटालो. दिल्ले म्हायती प्रमाण तो बायलेच्या ऑफिसांत साडी वा विचीत्र कपडे घालून वतालो आनी थंय बोवाळ घालतालो. ताका लागून बायलेक परत परत ऑफीस बदलचें पडटालें.
१८ लाखांची सुपारी दिली
घोवाच्या छळाक कंटाळून आनी लोकांचे लजेक लागून हे बायलेन ताचो काटो काडपाचें थारायलें. ते बायलेन एकल्याक १८ लाखांची सुपारी दिली. ऍडवान्स म्हणून बायलेन सुपारी घेतिल्ले व्यक्तीक ४.६ लाख रुपया दिले. ११ डिसेंबराक बायलेक तिच्या घोवाक सोरो पियेवपाक घातलो. उपरांत घोव न्हिदपाक गेल्या उपरांत ताका मारून उडयलो. हें मरण सैमीक आशिल्ल्याचें दाखोवपाचो ते बायलेन यत्न केलो.
म्हयनोभर तपास
पुलिसांक ट्रान्सवुमनचो खून जाल्ल्याचें कळ्ळ्या उपरांत तांणी गुन्यांव नोंद करून घेतलो. पोस्टमार्टमांत हें असैमीक मरण आशिल्ल्याचें दिसून आयलें. पुलिसांनी ह्या प्रकरणांत मरण आयिल्ले व्यक्तीच्या बायलेकडेन तपास सुरु केलो. पुरावे आनी हेर गजालींच्या आदारान निमाणें पुलिसां कडेन ते बायलेन आपलो गुन्यांव कबूल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
