भांगरभूंय | प्रतिनिधी
नवी दिल्ली, खबरां संस्थाः नोकरी करपी बायलां मदीं धूम्रपानाचे प्रमाण वाडलां. हाका लागून फुडाराक ह्या बायलांक फुफ्फुसांचो कॅन्सर जावपाचोय धोको वाडटा. हाचे वांगडाच रांदचे कुडींतल्या धुंवराक लागून बायलांक फुफ्फुसाचो कॅन्सर जावपाचें प्रमाणूय वाडत आसा अशें भलायकी तज्ञांनी मत उक्तायलां.
कामाच्या ताणाचेर उपाय म्हूण बायलांक धूम्रपान हो तात्पुरतो उपाय दिसूं येता. पूण प्रत्यक्षांत ताका लागून दीर्घकाळ भलायकेचे त्रास जातात. काम करपी सुमार 20 टक्के बायलांक तणावाक लागून धूम्रपान करपाची संवय जाल्या. फुडाराक तांकां फुफ्फुसाचो कॅन्सर जावं येता.
धूम्रपान केल्यार बायलांचे फुफ्फुस दुबळे जाता. धूम्रपान सोडल्यार फुफ्फुसाचे भलायके खातीर फायदेशीर थारता. हाका लागून कुडीच्या म्हत्वाच्या अवयवांक ऑक्सिजनाची पुरवण सुरळीत जाता, उर्जेची पातळी वाडटा आनी फुफ्फुसाचें काम सुदारता.
जिणेंत केन्नाच धूम्रपान करुंक ना अशा बायलांक फुफ्फुसाचो कॅन्सर जाल्ल्याचीं उदाहरणां आसात. दक्षीण आशियांत हें प्रमाण चड आसा. हाचे मुखेल कारण रांदचे कुडींतलो धुंवर. ह्या धुंवराक लागून बायलांक फुफ्फुसाचो कॅन्सर जावपाचो धोको वाडटा.
लक्षणां…..
खोकली, स्वास घेवपाक त्रास जावप, काळजात दुखप, खोकताना रगत येवप, वजन चड उणे जावप, भूक उणी लागप.
जतनाय कशी घेवप
धूम्रपान टाळचें, घरांतलें प्रदुशण उणें करप, रांदचे कुडींतलो धुंवर उणो दवरप, रांदपा खातीर निवळ इंधन वापरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
