भांगरभूंय | प्रतिनिधी
खबरां संस्था
केपटावनः बायलाचें टी-20 वर्ल्ड कप सर्तींत सद्या व्हडलो भूंकंप जाला. स्पॉट फिक्सिंग हें ताचें कारण आसा. हालींच बांगलादेशाचे एके खेळगडीन स्पॉट फिक्सिंगाची कागाळ केल्या. जमुना टीव्हीचे खबरे प्रमाण लता मंडल हिणे व्हो दावो केला. पाकिस्तानाच्या शोहले अख्तरान तिका स्पॉट फिक्सिंग करपाची ऑफर दिल्ली अशो मंडलान आरोप केल्ल्यान संवसारीक क्रिकेटीक धपको बसला.
लता मंडलान दिल्ले म्हायती प्रमाण स्पॉट फिक्सिंगाची ही घडणूक 14 फेब्रुवारीक ऑस्ट्रेलिया आड बांगलादेस हे मॅची उपरांतची आसा. त्या वेळार लताक शोहले अख्तरान स्पॉट फिक्सिंगाची ऑफर दिल्ल्याचो दावो केला. बांगलादेश क्रिकेट बार्डाच्या लांचलुचपत प्रतिबंधक विभाग ह्या प्रकरणाची आतां चवकशी करतलो.
लता मंडल ही बांगलादेश- ऑस्ट्रेलिया मॅचींत बांगलादेशाच्या प्लेईंग इलेव्हनांत नाशिल्ली. ही मॅच ऑस्ट्रेलियेन 8 विकेटीनी जिखल्ली. बांगलादेशान पयलीं खेळून 20 ओव्हरींत 7 बाद 107 धांवड्यो केल्ल्यो. बांगलादेशाची कॅप्टन निगार सुल्लाना हिणे 50 बॉलांत 57 धांवड्यो केल्ल्यो. ऑस्ट्रेलियेन 18.2 ओव्हरींत 2 बाद 108 धांवड्यो करून मॅच जिखल्ली. ऑस्ट्रेलियेच्या मेग लेनिंगान नाबाद 48 जाल्यार एलिसा हिलीन 37 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
