भांगरभूंय | प्रतिनिधी
खबरां संस्था
पोचेस्ट्रूमः बायलाचें पयले अंडर- 19 टी-20 वर्ल्ड कप क्रिकेट सर्तींत भारतीय पंगडान आयतारा जाल्ले फायनलींत इंग्लंडाक 7 विकेटीनी हारोवन संवसारीक वस्तादपणाच्या करंडाचेंर आपलें नांव कोरातींत केलें. सेनवेस पार्क हांगा जाल्ले फायनलीचेर भारतीय पंगडाचेंच वर्चस्व आशिल्लें.
कॅप्टन शफाली वर्मा हिच्या फुडारपणा खाला भारतीय पंगड हे पयले टी-20 संवसारीक करंड सर्तींचो किताब मेळोवपाच्या निर्धारान मैदानांर देंवल्लो. शफालीन टॉस जिखून पयलीं बॉलींग करपाचो निर्णय घेतलो आनी भारताच्या बॉलरांनी तो सारको थारोवन इंग्लंडाच्या सगल्या खेळगडींक 68 धांवड्यांत आवट केलें. इंग्लंडाच्या 69 धांवड्यांच्या आव्हानाचो फाटलाव करतना भारताची सुरवात बरी जाली मात 16 धांवड्यांचेर कॅप्टन शफाली वर्मा 11 धांवड्यांत 15 धांवड्यो करून बाद जालें. हन्ना बेकरान अलेक्सा स्टोनहावसा वरवीं ताका कॅच आवट केलें. त्या फाटोफाट ओपनर श्र्वेता लेगीत 6 बॉलांत 5 धांवड्यो करून बाद जालें. ते उपरांत सौम्या तिवारी आनी त्रिशा गोंगडी हांणी 46 धांवड्याची भागिदारी केली. 29 बॉलांत 24 धांवड्यो करून त्रिशा आवट जालें. सौम्यान 37 बॉलांत 24 धांवड्यो करून पंगडाक पयलेच अंडर-19 संवसारीक करंड सर्तींत जैत मेळोवन दिलें. भारतीय पंगडांत 14 ओव्हरींत तीन गडी वोगडावन जैत मेळयलें. सौम्या तिवारीन जैताचो शॉट मारलो.
ताचे पयलीं पयलीं खेळटना इंग्लंड भारता सामकार फकत 69 धांवड्याचें आव्हान दवोरपाक शकलो. इंग्लंडाचे बॅटिंगेची सुरवात बरी जाली ना. पयलेचओव्हरींत एक धांवडी जाल्ली तेन्ना लिबर्टी हिपच्या रुपांत तांची पयली विकेट पडली. ते उपरांत कॅप्टन ग्रेस स्क्रिव्हन्स हिका लेगीत भारताच्या बॉलरां सामकार खेळप कुस्तार जावपाक लागलें. ताणे फकत 4 धांवड्यो केल्यो. पयल्या 10 ओव्हरींत फकत 39 धांवड्यांत इंग्लंडाचो अर्दो पंगड आवट जालो. नियाम फिओन हॉलंडान 8 बॉलांत 10, रायना मॅकडोनाल्डान 24 बॉलांत 19, अलेक्सा स्टोनहावसान 25 बॉलांत 11 आनी सोफिया स्मेलान 7 बॉलांत 11 धांवड्यो केल्यो. हांका सोडून हेर बॅट्सवुमन दोन आंकडी धांवड्यो करपाक शकल्यो नात. भारता वतीन तीतसस साधू, अर्चना देवी आनी पार्शवी चोप्रान दरेकी 2 विकेटी घेतल्यो. मन्नत कश्यप, सोनम यादव आनी कॅप्टन शफाली वर्मान दरेकी 1 विकेट घेतली.
आयसीसीन टी-20 फॉर्मेटांत ही पयली अंडर 19 क्रिकेट सर्त सुरू केली आनी ती आयोजीत करपाचो पयलो मान दक्षीण आफ्रिकेक फावो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
