भांगरभूंय | प्रतिनिधी
राष्ट्रीय महिला आयोगा कडल्यान दखल: विजया रहाटकर
मडगांव: सद्या मनशाच्या तस्कीरच्यो घडणुको दसिपट्ट्यो दिसून येत आसात. बायलां विशीं चुकीचो संदेश दिवपी वॅबसायटी आनी पोर्टल हो गंभीर विशय आसा. ताचेर राष्ट्रीय आयोगा कडल्यान कारवाय करतले. लैंगीक छळ वा घरगुती मारपेट ह्यो समस्या आसात. तातूंतच सायबर क्रायमाचीय आव्हानां आसात. बायलांचो मानसन्मान राखपाची गरज आसा आनी ताची सुरवात घरा सावन जावची अशें मत राष्ट्रीय महिला आयोगाच्यो अध्यक्षा विजया रहाटकर हांणी उक्तायलें.
मडगांव रवींद्र भवनांत समाजांतल्या विवीध मळार कार्यरत आपसेवी संस्थंच्या प्रतिनिधीं कडेन राष्ट्रीय महिला आयोगाच्यो अध्यक्षा रहाटकर हांणी संवाद सादलो. ह्या वेळार अर्ज संस्था आनी राज्य महिला आयोगा वतीन बसण्णा हे बायलेन विदेशांतल्या बायलांच्या बंदीचो उजवाड घाल्लो तिच्या कार्याचो गौरव केलो. तशेंच हे विशीं राष्ट्रीय मिहला आयोगान दखल घेतल्या आनी विदेशांत आडकल्ल्या बायलांक परतून हाडटले अशें रहाटकर हांणी सांगलें.
महिला आयोग हो संवसार मोडपा खातीर न्हय जाल्यार संवसार जोडून दवरपा खातीर आसा. बायल एकाच घरांत दुसरे कुडींत रावंक शकता. पुलीस सांजवेळा उपरांत चवकशी करूंक शकनात. चवकशी करतना बायल पुलिशेची हाजेरी गरजेची आसा. बायलांक फुकट कायदेशीर सुविधा मेळटा अशें रंजिता पै हांणी सांगलें.
रहाटकर हांणी बायलांक मार्गदर्शन करतना सांगलें, गोंयांत बायलां खातीर विवीध मळार काम करपी एनजीओ कार्यरत आसात ही बऱ्याची गजाल. बायलांनी तांचे खातीरच्या कायद्याची म्हायती आसप गरजेची आसा. घरांत बायलांचो छळ. कुटुंबीक हिंसाचाराच्यो घडणुको. दादलो आनी बायल कायद्या मुखार समान आसतना बायलांनी अत्याचार सोंसून घेवचो न्हय. समाजांतल्यो वायट गजाली आडावपा खातीर सरकाराक कायदो करचो पडटा. समाज बदलत चल्ला. जोड कुटुंबां नात, आनी प्रस्न बदलत चल्ल्यात. मानसीक छळ लेगीत जायत आसात. ते खातीर घरगुती हिंसाचारा खातीर कायदो आसा. खंयचेय बायलेन कसलेच तरेचो अत्याचार सोंसून घेवचो न्हय. ताचे आड आवाज काडपाची गरज आसा अशेंय तांणी सांगलें.
कामाचे सुवातेर लैंगीक छळ जायत आसल्यार तो सोंसून घेवचो न्हय. बायलांच्या कायद्या विशीं प्रशिक्षण गरजेचें आसा. फोटो फॉर्म करप, डिजिटल अरेस्ट हे साबयर क्रायम सुरू आसात. मातृत्व हे बायलांक मेळिल्लें वरदान आसा. पूण बायलांचे भलायकी कडेन लक्ष दिवपाची गरज आसा. सरकारी येवजण्यो आसात. ताका लागून बायलांक गर्भावस्थेंत येत सावन भुरगें जाय मेरेन खूबशो येवजण्यो आसात. ह्यो येवजण्यो खबर आसप गरजचें आसा. चलयांक अजून लेगीत दुय्यम समजुपाच्यो घडणुको घडत आसात. बालविवाहाच्यो घडणुको अजूनय घडत आसात हें दुर्दैवी आसा. हाचो संबंद गरिबी, शिक्षण आनी बायलांक उणाक लेखपा विशीं आसा. बायलांक समाजीक सन्मान मेळपाची गरज आसा. निर्णय प्रक्रिये तांचो सहभाग गरजेचो आसा अशें रहाटकर हांणी सांगलें.
शिक्षण घेवप म्हणल्यार जालें अशें ना. जाल्यार आपले खातीर कायदो सुविधा खबर आसप गरजेचें आसा. बायलां कडल्यान त्यागाची भावना ही बरी गजाल. पूण ते गृहीत धरचें न्हय. मनशाची तस्करी हो गंभीर प्रस्न समाजा मुखार आसा. हातूंत बायलांचो आनी भुरग्यांचो छळ जायत आसता. फटीचें उलोवन मनशाची तस्करी करतात. ही गजाल लेगीत राष्ट्रीय महिला आयोगा कडल्यान गंभीरपणान घेतिल्ल्याचें रहाटकर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
