भांगरभूंय | प्रतिनिधी
मुख्यमंत्री डॉ. प्रमोद सावंत हांचें राजकी पक्ष, फुडाऱ्यांक आवाहन
पणजी: संसदेंत तशेंच विधानसभेंत बायलांक फावो त्या प्रमाणांत प्रतिनिधित्व मेळपा खातीर नारी शक्ती वंदन अधिनियम विधेयक संमत जावपाची गरज आसा. बायलांक प्रतिनिधित्व मेळचें म्हूण सगले राजकी पक्ष तशेंच राजकी फुडाऱ्यांनी मतभेद कुशीक दवरून एकठांय येवचें, अशें आवाहन मुख्यमंत्री डॉ. प्रमोद सावंत हांणी केलां.
संसदेचें खासा अधिवेशन 16 एप्रील सावन सुरू जाता. देशाच्या लोकशायेच्या वाटचालीतलो हो एक म्हत्वाचो पावंडो आसा. बायलांक प्रतिनिधित्व दिवपा खातीर 2023 वर्सा नारी शक्ती वंदन अधिनियम विधेयकाचो मसुदो तयार जालो. हें विधेयक संमत करपाची वेळ आतां आयल्या.
बायलांचे सशक्तीकरण आनी निर्णय घेवपाचे प्रक्रियेंत बायलांचो आस्पाव आसप गरजेचें थारता. समाजाची उदरगत ही बायलांच्या उदरगतीचेर निंबून आसता. बायलांची उदरगत जो मेरेन जायना, तो मेरेन समाजाची उदरगत जाली अशें म्हणपाक जायना.
घटणा तज्ञांनी विचारविनीमय केले उपरांत नारी शक्ती वंदन अधिनियम विधेयक तयार जालां. बायलांच्या उदरगती खातीर राजकी मतभेद पयस दवरून सगल्यांनी ह्या विधेयकाक तेंको दिवचो. देशाचो फुडार तशेंच जेंडर इक्विटी खातीर सगल्यांनी विधेयका वटेन आवाज उठोवचो, अशी मागणी मुख्यमंत्री डॉ. प्रमोद सावंत हांणी राजकी पक्षां लागीं केल्या. प्रधानमंत्री नरेंद्र मोदी हांचे विकसीत भारताचें सपन पुराय करपा सयत लोकशायेची बुन्याद घटमूट करपा खातीरचें हें पावल आसा, अशें मुख्यमंत्र्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
