बायलां आनी भुरग्यां आडच्या गुन्यांवां मदीं वाड

भांगरभूंय | प्रतिनिधी

नॅशनल क्रायम रेकॉर्ड ब्युरोची म्हायती

नवी दिल्ली, खबरां संस्था ः देशभरांतल्या एकंदरीत गुन्यांवांचें प्रमाण उणें जालां, पूण बायलां आनी भुरग्यां आड गुन्यांवा मदीं वाड जाल्ल्याची म्हायती नॅशनल क्रायम रेकॉर्ड ब्युरोन (एनसीआरबी) 2022 वर्साचो अहवालातल्यांन जाहीर केला. 2022 वर्सा वट्ट 58,24,956 गुन्यांव नोंद जाल्ले. 2021 वर्साच्या तुळेंत 60,96,310 म्हळ्यार 4.5 टक्के उणे जाले. अहवाला प्रमाण वेगवेगळ्या कारणांक लागून आत्महत्या करपाचें प्रमाण वाडलां. धक्को दिवपी गजाल म्हळ्यार कोरोना उपरांत 2021 वर्साच्या तुळेंत 2022 वर्सा अचकीत मरण येवपाचें प्रमाण 11.6 टक्क्यांनी वाडलें.

आत्महत्या: 13 हजार विद्यार्थ्यांनी जिवीत सोंपयलें

देशांत आत्महत्या करपाचें प्रमाण 4.2 टक्क्यांनी वाडलें. 2022 वर्सा 13 हजार विद्यार्थ्यांनी आत्महत्या केल्ली. परिक्षेंत अपेस येवप हें ताचे कारण. महाराष्ट्रांत सगळ्यांत चड 378, उपरांत मध्य प्रदेश 277 आनी मागीर झारखंड 174 विद्यार्थ्यांनी आत्महत्या केली.

जाण्टे: गुन्यांवांत 9.3 टक्के, मारपेटांत 27 टक्के वाड

2022 वर्सा जाण्ट्यां आड 28,545 गुन्यांव नोंद जाले. 2021 वर्साच्या तुळेंत 9.3 टक्क्यांनी चड आसा. 2022 वर्सा चडशीं जखमी (27.3%), उपरांत चोरी (13.8%) आनी फटवणूक (11.2 %) प्रकरणा आसात.

बायलां: गुन्यांव 4% वाडले, राजस्थानांत अत्याचाराचे प्रमाण चड

देशांत बायलां आड दर वराक 51 गुन्यांव घडतात. 2022 वर्सा अशे तरेचे 4.45 लाख गुन्यांव नोंद जाल्ले. 2021 वर्साचे तुळेंत तांतूत 4 टक्क्यांनी वाड जाल्या. 19.2 टक्के अपहरण आनी 7 टक्के अत्याचाराची प्रकरणा आसात. 31,516 अत्याचारा मदलें राजस्थानांत 5399, यूपी 3690 आनी मध्यप्रदेशांत 3029 अत्याचार जाल्यात.