भांगरभूंय | प्रतिनिधी
भांगरभूंय । प्रतिनिधी
पणजीः बायलां आनी भुरगीं उदरगत संचालनालयान विविध विभागांत 8 पदांची नोकर भरती जाहीर केल्या. ही पदां कंत्राटी पध्दतीचेर भरतले. ह्या पदांची भरती थेट मुलाखती वरवीं जातली. ही नेमणूक 31 मार्च 2027 मेरेनच्या कालावधी खातीर आसतली आनी मुजतवाड ही सरकाराचे मान्यतायेचेर निंबून आसतली.
बायलां आनी भुरगीं उदरगत संचालनालय केंद्र पुरस्कृत येवजण ‘मिशन वात्सल्य’ खाला जिल्हो भुरगें संरक्षण घटक (डीसीपीयू-उत्तर आनी दक्षीण), राज्य दत्तक संसाधन संस्था (एसएआरए) आनी राज्य भुरगें संरक्षण संस्था (एससीपीएस) सकयल पुरायपणान तात्पुरत्या स्वरुपांतल्या कंत्राटी पदां खातीर थेट मुलाखत आयोजीत केल्ल्याचे संचालनालयान जायराती वरवीं सांगला.
गरजेची पात्रताय, अणभव आनी पिरायेचे निकश हांची पुर्तताय करपी उमेदवारांनी वेळापत्रकांत नमूद केल्ले तारखेर आनी वेळार पणजेच्या बायलां आनी भुरगीं उदरगत संचालनालयाचे कचेरेंत आपल्या पूर्ण भरिल्ल्या विहीत नमुन्यांतले अर्ज आनी जल्म तारीख, पात्रताय आनी अणभव हांच्या आदारभूत कागदपत्रां वांगडा थेट मुलाखतीक हाजीर रावचे.
हातूंत एसएआरए विभागांत कार्यवळ अधिकारी, डिसीपीयु दक्षीण विभागांत संरक्षण अधिकारी आनी परिवेक्षक अधिकारी, डिसीपीयु दक्षीण आनी डिसीपीयु उत्तरांत समुपदेशक, डिसीपीयु दक्षीण विभागांत सोशल वर्कर, लेखाकार, डेटा एन्ट्री ऑपरेटर आनी आवटरीच वर्कर ही दरेकी एक पदां जाहीर जाल्यांत.
कार्यावळ अधिकारी, लेखाकारा, डेटा एन्ट्री ऑपरेटर हांचे खातीर थेट मुलाख 27 एप्रिलाक जातली. संरक्षण अधिकारी, सोशल वर्कर आनी आवटरीच वर्कर हांची मुलाखत 28 एप्रील आनी परिविक्षा अधिकारी, समुपदेशक, हांची मुलाखत 29 एप्रीलाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
