भांगरभूंय | प्रतिनिधी
सरन्यायाधीश चंद्रचूडः सत्र न्यायालय संकुलाचें उक्तावण
भांगरभूंय । प्रतिनिधी
पणजी : न्यायालयांत बायलां आड पोजडी भास वापरप बंद जावपाक जाय. तशेंच बायलां खातीर भलायकी आनी नितळसाणीच्यो गरजेच्यो सुविधा निर्माण जावप गरजेचें आसा, अशें सर्वोच्च न्यायालयाचे सरन्यायाधीश डॉ. धनंजय चंद्रचूड हांणी सांगलें. सर्वोच्च न्यायालयाचे निवाडे आतां कोंकणी आनी मराठी सयत भारतांतल्या सगळ्या भाशांतल्यान अणकारीत जावपाक लागल्यात, अशें तांणी सांगलें.
मेरशे जिल्हो आनी सत्र न्यायालय संकुलाचें शंनवारा उक्तावण जालें. सर्वोच्च न्यायालयाचे सरन्यायाधीश डॉ. धनंजय चंद्रचूड, मुख्यमंत्री डॉ. प्रमोद सावंत, कायदो मंत्री आलेक्स सिक्वेरा, हेर न्यायाधीश आनी मानेस्त कार्यावळीक हाजीर आशिल्ले.
मुंबय उच्च न्यायालयाचे निवाडे लेगीत थळाव्या भाशांतल्यान उपलब्ध जावपाक जाय. आब्रिट्रेशन केंद्रा सारक्यो गजाली गोंयांत जाल्यो जाल्यार संवसारीक पांवड्या वयलें अर्थीक केंद्र जावपाची तांक गोंयामदीं आसा, अशें सरन्यायाधीश डॉ. चंद्रचूड हांणी सांगलें.
गोंयची तोखणाय करतनाच डॉ. चंद्रचूड हांणी न्यायपालिकेच्या सध्य स्थितीचेर भाश्य केलें. गोंयची उदरगत आनी न्यायपालिके खातीर तयार जाल्ल्यो सुविधा पळोवन आपूण प्रभावात जाला. सामान्य मनीस सगळ्यांत पयलीं न्याया खातीर जिल्हो आनी सत्र न्यायालयांत वता. जिल्हो आनी सत्र न्यायालय हो न्यायपालिकेचो कणो आसा. याचिकादाराक योग्य तरेची वागणूक आनी सुविधा मेळपाक जाय. नवे इमारतीक लागून याचिकादार, वकील, सरकारी अधिकारी तशेंच लोकांची बरी वेवस्था जातली. बायलां वकील आनी बायलां कर्मचाऱ्यांक भलायकी तशेंच नितळसाणी खातीर सुविधा निर्माण करपाची गरज आसा. सुसज्ज इमारतीक लागून सुविधा निर्माण करप शक्य जातलें, अशें सरन्यायाधीश डॉ. चंद्रचूड हांणी सांगलें.
अर्थीक केंद्र जावपाची तांक
सोबितकाये खातीर गोंय हें पुराय संवसारात फामाद आसा. गोंयांत आर्बिट्रेशन केंद्र जाले जाल्यार संवसारीक पावंड्या वयलें अर्थीक केंद्र जावपाची तांक गोंया कडेन आसा. सरकारन हे खातीर यत्न करपाक जाय, अशी सुचोवणी सरन्यायाधीश डॉ. चंद्रचूड हांणी केली.
न्यायीक अकादमी गोंयांत जावची
सत्र न्यायालयाचे पोरणे इमारतींत न्यायीक अकादमी स्थापन करपाचो विचार सरकारान करचो. न्यायीक अकादमीक लागून न्यायालयीन अधिकाऱ्यां सयत नागरी सेवा अधिकाऱ्यांक प्रशिक्षण दिवप शक्य जातलें, अशें सरन्यायाधीश डॉ. चंद्रचूड हांणी सांगलें.
उच्च न्यायालयाचे निवाडे थळाव्या भाशेंतल्यान जावचे
सर्वोच्च न्यायालयाचे निवाडे कोंकणी, मराठी सयत हेर भाशांनी अणकारीत जावपाक लागल्यात. उच्च न्यायालयाचे निवाडे थळाव्या लोकांक कळटात ते भाशेंत अणकारीत जावपाक जाय, अशें डॉ. चंद्रचूड हांणी सांगलें.
न्याय बेगीन दिवपाक नवें संकूल पूरक थारतलें: मुख्यमंत्री
धर्मो रक्षती रक्षत: प्रमाण लोकशाये खातीर न्याय आनी समानता आसप गरजेचें आसा. गोंय सरकार सेगीत न्यायपालिकेक तेंको दिता. नवें संकूल प्रलंबीत खटले बेगीन निकालात काडपा सयत लोकांक बेगीन न्याय दिवपाचे प्रकियेंत उपेगी थारतले, अशें मुख्यमंत्री डॉ. प्रमोद सावंत हांणी सांगलें. सत्र न्यायालय हें सर्वोच्च न्यायालयाचोच फाटो आसा. न्यायदाना वरवीं लोकशायेच्या मुल्यांची जतनाय करतानाच गरिबी पयस जावन सुशासनाचें राज्य स्थापीत करपाची जापसालदारकी न्यायपालिकेची आसा, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
