भांगरभूंय | प्रतिनिधी
भारत हें परंपरेचें कुळारुच. भारतीय हातमाग उद्देग हो परंपरेक सगळ्यांत लागींचो आनी सगळ्यांत जितो- जिवो. हातमागांतल्यान तयार केल्ली खंयचीय वस्तू घेतना तुमकां तुमी तुमचे परंपरेंत आनी संस्कृतायेंत रुजल्या, अशें नक्कीच दिसतलें. उद्देग आनी भारतीय संस्कृताये खातीर हातमाग विणप्यांक तांणी केल्ल्या समर्पीत योगदानाचो भोवमान करपाक राश्ट्रीय हातमाग दीस मनयतात. विणकारांनी एकाच कपड्याच्या कुडक्यांत घाल्ले कश्ट आनी आवड अतुलनीय अशी आसा…. आनी हातान विणिल्ल्या आनी कांतिल्ल्या कपड्यांत ओतिल्लो मोग कसो विसरूं येता?
भावेया हॅंडलूम्स आनी ग्लोबल टू लोकल हांच्या जोडपालवान आनी SheShyns बायलां सशक्तीकरण गटाच्या सहकार्यान एक खाशेली कार्यावळ घडोवन हाडली आनी राष्ट्रीय हॅंडलूम दिसा निमतान बायलांक हातमागाचेर आपलीं कथा विणपाक एक मंच मेळोवन दिलो. ह्या खाशेल्या उपक्रमान राज्यभरांतल्या बायलांक देशांतल्या वेगवेगळ्या वाठारांनी आनी शिमे भायर लेगीत हातमाग कापडान एकठांय हाडले. काश्मीरी हातमाग, ओडिशा ट्रायबल, बेगमपुरी, बंगाल लिनेन, गोंयची स्वताची कुणबी, केरळ कासावू, कांजीवरम आनी हेर जायत्या विणांनी त्या त्या राज्यांची खाशेली परंपरा विस्तारान दाखयल्या.
गोवा चेंबर ऑफ कॉमर्स अँड इंडस्ट्रीच्या बायलांच्या फांट्याची अध्यक्ष आनी ग्लोबल टू लोकल सुपरमार्केटाची संस्थापक आशा आरोंदेकार हांणी ह्या उपक्रमाची तोखणाय करून पारंपरीक विणकारांनी ही खाशेली कलेची सराव करून एक आदर्श घालून दिला अशें सांगलें. भारतीय म्हूण आमची अस्मिताय दाखोवपी ह्या परंपरांक आदार दिवपाचें आवाहन तिणें केलें.
गोवा पॉलिटेक्निक कॉलेजींतली फॅशन डिझायनर आनी वरिश्ठ प्राध्यापक राहिला खान हांणी हातमागाचें म्हत्व आनी तातूंतल्या खाशेलपणांचेर भर दिलो. हातमाग कसो वळखप आनी राष्ट्रीय हातमाग दिसाचें म्हत्व तिणें सांगलें. भावेया हॅंडलुम्साची धनी आनी शेशाइन्स बायलां सशक्तीकरण गटाची संस्थापक गौरी जोशी हांणी आपल्या येवकार उलोवपांत हातमागांचें एक आगळें भावनीक मोल आसा आनी ही परंपरा फुडले पिळगेक दिवपाची गरज आसा अशें सांगलें.
ह्या वेळार हाजीर आशिल्ल्या बायलांनी स्वता घाल्ल्या हातमागाच्या कपड्या कडेन संबंदीत एक खाशेली काणी सादर केली. हातमाग कापड वेगवेगळ्या शैलींनी, पारंपरीक तशेंच अस्तंती फ्युजनात दाखयलें. उपरांत बायलांन फॉन्टनहायसाचें संस्कृतीक नदरेन गिरेस्त दायज घरांच्या गल्लींतल्यान रिल आनी चित्रांच्या रुपांत संमेलनाचें दस्तावेजीकरण केलें.
प्रज्ञा राणे आनी सोनिया शेटकार हांणी सूत्रसंचालन केलें. हे कार्यावळीक ग्लोबल टू लोकल सुपरमार्केट, शुअरजीनियस इव्हेंटसाचे कोको फ्रेश, खाऊ डॉट कॉम आनी टॅसेल्स हांचें योगदान मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
