भांगरभूंय | प्रतिनिधी
मधुराणी गोखले : मोरजे नारी शक्ती खेळां महोत्सवाचें आयोजन
भांगरभूंय । प्रतिनिधी
पेडणें : महिला दीस वर्साचे 365 दीस आसतात. फक्त एक दीस महिला दीस मनोवन चलचें ना. तो वर्सभर चालूच दवरचो. बायलांनी आपले जिणे खातीर सप्तकांतलो एकतरी दीस स्वता खातीर राखीव दवरचो. जिवीतभर संवसाराचो गाडो चलत आसता, पूण आमी आमचे खातीर कितलो वेळ दितात, हाचो विचार करचो, असो उलो ‘आई तू कुठे काय करतेस’ची अभिनेत्री मधुराणी गोखले हांणी मारलो. मांद्रेंचे आमदार जीत आरोलकार आनी मांद्रें उदरगत संस्थे वतीन नारी शक्ती खेळां महोत्सवाचें आयोजन आनी इनामां भेटवण सुवाळ्यांत ती मुखेल सोयरी म्हूण उलयताली.
ह्या वेळार खास आकर्शण म्हूण खलनायकाच्यो भुमिका गाजयल्लो सिने अभिनेतो शक्ती कपूर, मोरजीचे सरपंच पवन मोरजे, तुयेंची सरपंच सुरक्षा नायक, अॅड. सिद्धी आरोलकार, मुक्ता, पंच रजनी शिरोडकार, पंच स्वप्नील शेटगांवकार, केरीची सरपंच धरती नागोजी, मांद्रेंची आदली सरपंच तशेंच सध्याची पंच रोजा उर्फ मिंगेल फर्नांडीस, पंच रॉबर्ट फर्नांडीस, हरमलचे आदले सरपंच तशेंच सध्याची पंच संतान फर्नांडीस, मांद्रें पंच किरण सावंत, तुयें पंच स्विटी नायक, पंच साळगांवकार हाजीर आशिल्ले.
मधुराणी गोखले हांणी सांगलें, दरेके बायलेक दर दिसा शक्ती प्रदर्शन करचेंच पडटां. घर संवसार सांबाळटना आपले भलायके कडेन आडनदर करून चलची ना. अश्या खेळांतल्यान शारिरीक तंदुरुस्ती मेळटा. आमदार जीत आरोलकार हांणी आगळ्या वेगळ्या पद्दतीन महिला दिसा निमतान खेळां महोत्सवाचें आयोजन करून सगळ्या बायलांनी दीसभर आपलो वेळ हे सुवातेर दिवन एक बरो उपक्रम चालीक लायिल्ले खातीर गोखले हांणी समाधान उक्तायलें.
ह्या वेळार शक्ती कपूर हांणी महोत्सवांत मार्गदर्शन करतना अदीं मदीं कांय चित्रपटांतलें संवाद सादर करून हाजीर आशिल्ल्यांचीं मनां जिखलीं. आमदार जीत आरोलकार हांचे वतीन भेटवस्तू, शाल, फुलांतुरो भेटोवन मधुराणी गोखले आनी शक्ती कपूर हांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
