भांगरभूंय | प्रतिनिधी
आशियायी खेळां सर्तींत भारताच्या बायलांच्या हॉकी पंगडाक सेमी फायनलींत येजमान चीन पंगडा आड 0-4 अशा फरकान हार घेवची पडली. हे हारीक लागून भारताचें सेगीत दुसरे खेपे आशियायी खेळांतले फायनलींत सुवात मेळोवपाचें सपन भंगलें. 2018त जकार्ता आशियायी खेळांत अखेरच्या खिणाक जापाना आड भांगरा पदकाचे मॅचींत हार घेवची पडिल्ली. भारताच्या बायलांच्या पंगडाक 1982 सावन एकदाय भांगरा पदक मेळूंक ना. 1998तले आशियायी खेळांत भारताच्या पंगडाक फायनलींत दक्षीण कोरिया कडल्यान हार घेवची पडिल्ली.
चीना वतीन पयलो गोल जियाकी झोंग जियाकीन केलो, जाल्यार दुसरो गोल झोउ मेइरोंग हिणें केलो. तिसरो गोल लियांग मेयून जाल्यार चौथो गोल गु बिंगफेंग हिणें केलो.
हे हारीक लागून भारताक कांश्या पदका खातीर खेळचें पडटलें. चीना आड भारताक 10वे खेपे हार घेवची पडली. जाल्यार 11 मॅची जिखल्यात. दोन मॅची बादाबाद उरल्यात.
भारताच्या पंगडान गट पांवड्यार जबरदस्त प्रदर्शन केल्लें. पयले मॅचींत सिंगापूर पंगडाक 13-0 असो हारयिल्लो. ते उपरांत मलेशिया आड 6-0 फरकान जैत जोडिल्लें. दक्षीण कोरिया आडची तिसरी मॅच 1-1 अशी बादाबाद उरिल्ली. ते उपरांत हॉंगकॉंग पंगडाक 13-0 अशा व्हडा फरकान हारयिल्लो.
भारतान गट पांवड्यार 33 गोल केल्ले, जाल्यार फकत एकूच गोल घेतिल्लो. पूण, सेमी फायनलींत ताका जैताचो क्रम राखपाक जमलो ना.
मजगतीं, भारताचो दादल्यां पंगड आयज जावपी फायनलींत जापाना आड खेळटलो. पॅरीस ऑलिम्पिकांत थेट सुवात मेळोवपा सयत भांगरा पदक जिखपाचो दोनूय पंगडांचो यत्न आसतलो. भारतान 1966, 1998 आनी 2014त भांगरा पदक जिखलां. जाल्यार जापानान फाटले आशियायी खेळांत भारताक हारोवन पयले खेपे भांगरा पदक जिखिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
