भांगरभूंय | प्रतिनिधी
भारतीय बायलांच्या क्रिकेट पंगडान 19वे आशियायी खेळांत भांगरा पदक जिखलें. फायनलींत ताणें श्रीलंका पंगडाक 19 धांवड्यांनी हारयलो.
टॉस जिखून पयलीं बॅटींक करतना भारतान निर्धारीत 20 ओव्हरींनी 7 विकेटी वगडावन 116 धांवड्यो केल्यो. उपरांत श्रीलंका पंगडाक 8 बाद 97चेर आडायलो.
स्मृती मंधाना आनी जेमिमा रॉड्रिग्स हांचे भागिदारीक लागून भारताक 116 धांवड्यां मेरेन मजल मारप शक्य जालें. ते उपरांत तितास साधून आपले पयल्या दोन ओव्हरींनी तीन धपके दीत श्रीलंका पंगडाक बॅकफुटाचेर धुकल्लो. भारतान पयले खेपे आशियायी खेळांत क्रिकटींत भांगरा पदक जिखलें. भारताचें हें दुसरें भांगरा पदक थारलें. सकाळीं नेमबाजांनी 10 मिटर अॅर रायफल सांघीक गटांत भांगरा पदक जिखिल्लें.
सादारण मोखीचो फाटलाव करपी श्रीलंका पंगडाक तितास साधून दोन ओव्हरींनी तीन धपके दिले. हसिनी परेराची कॅच सुटली ना जाल्यार तितास हिका चवथी विकेट मेळपाची. 18 वर्सां पिरायेचे तितासान आपले पयले ओव्हरींत अनुष्का संजीवनी आनी विष्मी गुणारत्ने हांकां बाद केलीं. ते उपरांत आपले फुडले ओव्हरींत श्रीलंकेची येसस्वी बॅट्समन चमारी अटापट्टुची विकेट घेत भारताक व्हड येस मेळोवन दिलें. पूण, राजेश्वरी गायकवाडाचे एकेच ओव्हरींत हसिनीन चवके आनी सके मारले. पूण, हसिनीक ही ताकतीक म्हारग पडली. एके चुकीच्या शॉर्टान तिणें (25) आपली विकेट वगडायली. राजेश्वरीन मोठें येस मेळयलें.
ओशादी रणसिंघे आनी निलाक्षी डी सिल्वा हांणी श्रीलंकेचो डाव सांबाळ्ळो. पूण, बॉल आनी धांवड्यो हातूंतलें अंतर वाडत गेलें. अखेरच्या पांच ओव्हरींनी श्रीलंकेक 43 धांवड्यांची गरज आशिल्ली. 17वे ओव्हरींत पुजा वस्त्राकरान 28 धांवड्यांची भागिदारी फोडली. निलाक्षी (23) बोल्ड जाली. 18 बॉलांनी श्रीलंकेक 33 धांवड्यांची गरज आशिल्ली आनी श्रीलंके खातीर रणसिंघेच्या रुपान अखेरची आस्त आशिल्ली. दिप्ती शर्मान भारताक रणसिंघेची म्हत्वाची विकेट मेळोवन दिली. रणसिंघे 19 धांवड्यांचेर कॅच बाद जाली.
दिप्तीन 18 ओव्हरींत तीन धांवड्यो दिल्यो. श्रीलंकेक निर्धारीत 20 ओव्हरींनी 8 विकेटी वगडावन 97 धांवड्यो करप शक्य जाल्यो आनी भारताक 19 धांवड्यांनी जैत फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
