भांगरभूंय | प्रतिनिधी
आयज 6 डिसेंबर डॉ. बाबासाहेब आंबेडकर हांचो महापरिनिर्वाण दीस. आयच्या दिसा म्हणल्यार 1956 वर्सा डॉ. बाबासाहेब आंबेडकर आपल्या लाखांनी अनुयायांक सोडून कायमचे गेले. डॉ. बाबासाहेब आंबेडकर हांकां महापरिनिर्वाण दिसा नमळायेचीं आर्गां. डॉ. बाबासाहेब आंबेडकर हांणी आपली पुराय जीण दीन, दलीत, उपेक्षीत, वंचीत वर्गा खातीर घालयली. ह्या वर्गां खातीर बाबासाहेबांनी जें कार्य केलां ते तर सगल्यांकूच खबर आसा. पूण डॉ. बाबासाहेब आंबेडकर हांणी बायलां खातर जें कार्य केलें तें खूब उण्या लोकांक खबर आसा. डॉ. बाबासाहेब आंबेडकर हे खऱ्या अर्थान बायलांचे उद्धारकर्ते आसात. पूण दुर्दैवान आयजूय दशांतल्या खूबशा बायलांक हें खबर लेगीत ना. बाबासाहेबांनी बायलां खातीर जें कार्य केलां तें हाचें आदीं कोणूच करूंक शकलो ना.
आमच्या दादलो प्रधान संस्कृतायेंत बायलां ह्यो गुलामूच आशिल्ल्यो. बायलांक गुलामाचीच वागणूक मेळटाली. सामकीं उच्च वर्णीय बायलां लेगीत गुलामाचीच जीण जगतालीं. डॉ. बाबासाहेब आंबेडकर अस्पृश्या उपरांत बायलांकूच उपेक्षीत मानताले. रमाबाई हांकां बरयिल्ल्या पत्रांत ते म्हणटात, बायलांचे उदरगती खातीर आनी तांचे मुक्ती खातीर लडपी हांव झुजारी आसा. बायलांची ह्या गुलामींतल्यान सुटका करपा खातीर हांव निमाण्या खिणा मेरेन झुजतलों. बाबासाहेबांनी तांचीं उतरां खरीं करून दाखयलीं. ते राज्यघटनेच्या माध्यतांल्यान.
बाबासाहेबांनी राज्यघटनेच्या माध्यमांतल्यान बायलांक इतले अधिकार दिल्यात की जे तांकां हजारांनी वर्सां आनी 33 कोटी देव लेगीत दिवंक शकले नात. पुरुशप्रधान संस्कृती आनी मनुवादी विचारसरणीक लागून ज्या बायलांक दादल्यांच्या पांया कडेन स्थान आशिल्लें तीं बायलां आयज दादल्यांचे बरोबरीन उब्यो रावतात. भारतीय बायलां जो आयज मेकळो स्वास घेतात तो फक्त डॉ. बाबासाहेब आंबेडकर हांकांच लागून घेतात. हे खातीर भारतीय बायलांनी डॉ. बाबासाहेब आंबेडकर हांकां वंदनीय मानूंक जाय.
नोव्हेंबर 1938 वर्सा कुटुंब नियोजन संबंदीचें विधेयक डॉ. बाबासाहेब आंबेडकर हांच्या यत्नांक लागूनच मुंबय विविधमंडळांत आयिल्लें. तांणी बायलांच्या हिता खातीर आनी कल्याणा खातीर कुटुंब नियोजनाचो मार्ग दाखयलो. भुरगीं केन्ना जाय हाचें स्वातंत्र्य तांणी बायलांक दिलें. डॉ. बाबासाहेब आंबेडकर हे भारताचे कामगार मंत्री आसतना तांणी बायलां सक्षमीकरणाचें खूबशे निर्णय घेवन ताची अंमलबजावणी केली. खण कामगार बायलांक प्रसुती भत्तो, कोळशा खणींत काम करपी बायलांक दादल्यां इतलीच मजुरी. एक परस चड बायलां (घरकान्न) करपा खातीर कायद्यान बंदी, मजूर आनी कश्टकरी बायलांक 21 दीस किरकोळ रजा. एका म्हयन्याची हक्काची रजा, दुखापत जाल्यार लुकसाण भरपाय आनी वैजकी रजा, बायलांक पगारी बाळंतपणाची रजा, 20 वर्सां काम करून निवृत्त जाले उपरांत मरसर निवृत्ती वेतन अशें बायलां खातीर खूबशे क्रांतीकारी निर्णय तांणी कामगार मंत्री आसतना घेतले.
बाबासाहेबांनी 1947 वर्सा कायदो मंत्री आसतना हिंदू संहिता विधेयक अर्थांत हिंदू कोड बिलाचो प्रस्ताव संसदेंत मांडलो. हें विधेयक क्रांतीकारी आशिल्लें. हिंदू वैयक्तीक कायद्यांत एकाच वेळार परस्परपुरक पुरोगामी तत्वां समाविश्ट करपाचें हें क्रांतिकारक पावल आशिल्लें. अस्पृश्यतायेचें उच्चाटन, लग्नसंबांदातली बायल दादलो समानताय, घोवान केल्ले अन्याय अत्याचारा आड दाद मागपाचो अधिकार, बायलांक घटस्फोट घेवपाचो अधिकार, वारसो हक्काचो लाव बायलांकूय दिवपाची तरतूद आदीं तत्वां ह्या बिलांत डॉ. बाबासाहेब आंबेडकार हांणी आस्पावीत केल्लीं. डॉ. बाबासाहेबांच्या मतान समाजीक न्यायाचो लढो येसस्वी जावपा खातीर हिंदू समाजाचो वैयक्तीक कायद्यांत जाती वेवस्था आनी पुरुशप्रधानता हांकां न्हयकार दिवन समान वैयक्तीक संबंदांची बुन्याद उबी करप गरजेची आसा. दुर्दैवान ह्या विधेयकाक संसदेंत खर विरोध जालो.
सुरवातेक प्रधानमंत्री पंडित जवाहरलाल नेहरू हांचो ह्या विधेयकाक तेंको आशिल्लो. पूण काँग्रेसींतल्या सनातनी विचारांच्या फुडाऱ्यांनी ह्या विधेयकाक खर विरोध केले उपरांत पंडित नेहरू हांणी हें विधेयक फाटीं घेवचें अशी विनंती बाबासाहेबांक केली. बाबासाहेबांनी देशाची राज्यघटना तयार करतना जितलें कश्ट घेतिल्लें तितलेच कश्ट हें विधेयक तयार करतना तांणी घेतिल्ले. ताका लागून बाबासाहेबांक खूब वायट दिसलें.
हिंदू कोड बिलाक जावपी विरोध बाबासाहेबां खातीर खूबच त्रासदायक थारलो. निमाणें ह्याच मुद्या वेल्यान तांणी मंत्रीपदाचो राजिनामो दिलो. खंयचीय चळवळ बायलां बगर पुराय जावंक शकना. समाजीक क्रांती करपाची आसत जाल्यार तातूंत बायलांचो आस्पाव आसचोच अशें बाबासाहेबाचें मत आशिल्लें म्हणून तांच्या सगल्या आंदोलनांनी बायलांचो आस्पाव आशिल्लो. मागीर तें 1927 वर्साचें चवदार तळ्याचें आंदोलन आसूं वा 1930 वर्सा नासिकांतल्या काळाराम देवळांतलें आंदाेलन आसूं. 1942 च्या नागपूरांत जाल्ले बायलांचे परिशदेंत बायलां व्हड संख्येन वांटेकार जाल्ल्यो.
लग्न हें चलयेचे उदरगतींत आडसर थारचें न्हय. चलयांचेर लग्न लादचे न्हय तें तिचे संमतिनूच तें जावचें. लग्ना उपरांत बायल ही घोवाची गुलाम नाका इश्टीण जावंक जाय. घोवाचे संपत्तींत घरकान्न लेगीत समान वांटेकारी आसा. बायलेचे सुरक्षेची जापसालदारकी घोवाची आसून तिका शारिरीक वा मानसीक त्रास जर घोवान दिलो जाल्यार ताका कायद्यान ख्यास्त जावंक जाय अशें तांचें मत आशिल्लें. भारतीय राजघटना बरयतना डॉ. बाबासाहेब आंबेडकर हांणी राज्यघटनेचें कलम 14, 15, 15(3), 16(2), 39(क), 39(घ), 39(ड), 42, 325 आदीं कलमांचो अंतर्भाव करून बायलांचे हीत आनी कल्याण सांबाळपाचो यत्न केलो. दुर्दैवान देशांतलीं बायलां आयजूय बाबासाहेबांच्या ह्या कार्या विशीं अनभिज्ञ आसात. बाबासाहेबांचे भारतीय बायलांचेर खूब उपकार आसात. बाबासाहेबांनी बायलां खातीर इतलें करून दवरलां की आनीक खूबशे जल्म घेवन लेगीत हे उपकार फारीक
जावचे नात.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
