भांगरभूंय | प्रतिनिधी
नवी दिल्ली, खबरां संस्था ः बायलो दर एका मळार आयज दादल्यां बरोबर काम करतात आनी दरेक मळार फुडें वचत आसात, पूण तरी लेगीत बायलांचे सुरक्षेचो प्रस्न मात तसोच उरला. दिसान दीस घरगुती अत्याचार, बलात्कार, बायलांचेर अॅसिड हल्लो सारकिल्ले गुन्यांव वाडत आसात.
2016 ते 2021 ह्या काळांत भारतांत बायलां आड अत्याचाराची 22.8 लाख प्रकरणां मुखार आयल्यात आनी दर दिसा हो आंकडो वाडत आसा. फाटल्या वर्सा 31,878 बलात्कार प्रकरणां पुलिशेंत नोंद जाल्ली आतां तांतूत 15 टक्क्यांनी वाड जाल्या. बायलांची सुरक्षीतताय हो देशांतलो सामको गंभीर विशय. बायलो ना घरांत ना भायर खंयच सुरक्षीत नात. पूण आमच्या भारतीय संविधानान आनी न्यायवेवस्थेन बायलांची सुरक्षीतताय मतींत दवरून कांय कायदे तयार केल्यात आनी सरकार कांय उपक्रम चालीक लायतात.
निर्भया फंड (Nirbhaya Fund)
बायलांचे सुरक्षे खातीर निर्भया फंड तयार केला. ह्या निधींत कोटी रुपयांची तरतूद जाल्या आनी ह्या निधीचो उपेग पिडित बायलेक सुरक्षा दिवपा खातीर करतात.
१८१ हेल्पलाइन (181 Helpline)
हो एक हेल्पलायन क्रमांक आसा. खंयचीय समस्या, हिंसाचार वा कठीण परिस्थिती निर्माण जाल्यार ही सेवा बेगोबेग कारवाय करपाक सक्षम आसा. ही सेवा 24 वरां उपलब्ध आसा.
वन-स्टॉप सेंटर (One-stop Centre)
पिडित बायलां खातीर मजत केंद्र म्हणून वन-स्टॉप सेंटर स्थापन केलां. खंयच्याय प्रकारच्या हिंसाचाराक बळी पडपी बायलांक ह्या केंद्रांत रावपाक मेळटा.
मेरी सहेली (Meri Saheli)
रेल्वेंतल्यान एकटी वा कुटुंबासयत भोंवपी दरेक बायल मेरी सहेली उपक्रमाक लागून सुरक्षीतपणान प्रवास करपाक शकता. रेल्वे संरक्षण दळान दक्षीण पूरव रेल्वेंत मेरी सहेली उपक्रम सुरू केला.
निर्भया पंगड (Nirbhaya Squad)
दिल्लींतल्या निर्भया बलात्कार प्रकरणा उपरांत मुंबय पुलिसांनी बायलांचे सुरक्षे खातीर खासा प्रशिक्षीत बायल पुलीस अधिकाऱ्यां सयत 91 निर्भया पंगड तयार केल्यात. हो पंगड फकत बायलांचे सुरक्षे खातीर 24×7 वावुरता.
खरें म्हणल्यार बायलांक सुरक्षीत दवरप होच हेतू. हे फाटभुंयेर बायलांचे सुरक्षे खातीर वेगवेगळ्या राज्यांनी वेगवेगळे हेल्पलायन नंबर सुरू केल्यात. त्या नंबराचेर फोन केल्यार बायलांक रोखडीच मजत मेळटा. हाचे भायर बायलांचे सुरक्षे खातीर सरकारान कांय अॅप्सय सुरू केल्यात.
१. Eyewatch SOS
२. SpotnSave
३. iGoSafely
५. Smart 24×7
६. bSafe
७. Shake2Safety
८. Trakie
९. My SafetyPin
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
