भांगरभूंय | प्रतिनिधी
दादल्यांच्या टी-20 आशिया करंड सर्त सोंपल्या उपरांत आशियायी क्रिकेट समितीन बायलांचे टी-20 आशिया करंड क्रिकेट सर्तीचें वेळापत्रक जाहीर केलें.
बायलांची टी-20 आशिया करंड क्रिकेट सर्तीक 1 ऑक्टोबरा पसून बांगलादेशांत सुरवात जातली आनी फायनल 15 ऑक्टोबराक जातली. आशिया क्रिकेट समितीचे अध्यक्ष जय शाह हांणी काल सर्तीचें वेळापत्रक जाहीर केलें. भारत आनी पाकिस्तान ह्या पंगडां मदली मॅच 7 ऑक्टोबराक जातली.
रावंड रॉबीन पद्दतीन सर्तीचें आयोजन केलां. दरेक पंगड स मॅची खेळटलो. हातूंतले पयले चार पंगड सेमी फायनली खातीर पात्र जातले. सेमी फायनली 13 ऑक्टोबराक जातल्यो. येजमान बांगलादेशा खेरीत भारत, पाकिस्तान, श्रीलंका, युएई, थायलॅण्ड आनी मलेशिया हे पंगड वांटो घेतले.
अफगाणिस्तानांत तालिबानाची राजवट आयल्या उपरांत थंयच्या बायलांक खेळांनी वांटो घेवपाक बंदी आशिल्ल्यान अफगाणिस्तानाचो पंगड सर्तींत खेळटो ना. उक्तावणाची मॅच येजमान बांगलादेश आनी थायलॅण्ड ह्या पंगडां मदीं 1 ऑक्टोबराक जातली. त्याच दिस भारत आनी श्रीलंका ह्या पंगडां मदीं दुसरी मॅच जातली.
बायलांची आशिया करंड सर्त 2012 पसून टी-20 प्रकारान खेळप चालू आसा. 2012त आठ पंगडांत दोन गटांनी विभागून घाल्ले. 2016 आनी 2018त उणे पंगड आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
