भांगरभूंय | प्रतिनिधी
नवी दिल्ली, खबरां संस्था: भारताच्या ७८व्या स्वातंत्र्य दिसा निमतान लाल किल्ल्यार आयोजीत राष्ट्रीय बावटो हुबोवपाच्या सुवाळ्यांत प्रधानमंत्री नरेंद्र मोदी हांणी वांटो घेतलो. तांचे हस्तुकीं हे इतिहासीक बांदावळीचेर बावटो हुबयले उपरांत तांणी लोकांक संबोधीत केलें. ह्या वेळार तांणी वेगवेगळ्या प्रस्नांचेर भर दिलो आनी बायलांचेर जावपी अत्याचारांच्या प्रस्नाचेर उलयतना खर तिडक उक्तायली.
गुन्यांवकारांक ख्यास्त जावन हे ख्यास्तीचेरूय व्हड प्रमाणांत चर्चा जावपाक जाय, जाका लागून अश्या प्रवृत्तीच्या लोकांच्या मनांत भंय निर्माण जातलो अशें तांणी सांगलें.
बायलांचेर जावपी अत्त्याचारांचेर उक्तायली चिंता
पीएम मोदींनी लाल किल्ल्या वेल्यान राकेसी वृत्तीचेर तिडक उक्तायत म्हणलें, ’आयज बायलांच्या निर्णय तांकी पसून तांच्या कर्तृत्त्वाची तोखणायेची कामगिरी आमी पळयतात. मात अशें आसून लेगीत कांय चिंता करपा सारक्यो गजाली मुखार येतात.
एक समाज म्हणून आमी खर विचार करपाक जाय. आमच्या आवय, भयणींचेर अत्त्याचार जातात. ते प्रमाण लोक तिडक उक्तायतना हांवूय पळयतां. आतां ह्या आक्रोशा कडेन देशान, समाजान आनी राज्य शासनान खरपणान पळोवचें. बायलांचेर जावपी गुन्यांवांची खर चवकशी करची, हें काम करप्यांक बेगीनूच खर शिक्षा करप हें समाजांत विस्वास निर्माण करपा खातीर सामकें गरजेचें, अशें तांणी सांगलें.
बलात्कार वा बायलांचेर जावपी अत्याचारांची बरीच चर्चा जाता. मात गुन्यांवगारांक ख्यास्त जाता तेन्ना मात ताचेर चर्चा जायना. मात आतां ती जावकूच जाय. कारण, असलें पाप करप्यांच्या मनांतूय भंय बसपाक जाय, तांची अशी अवस्था जावपाक जाय, की अशें कितेंय केल्यार फासार चडचें पडटा, हो भंय निर्माण जावंकूच जाय, अशी तिडक प्रधानमंत्र्यानी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
