बायलांचें सगळ्याच मळांचेर व्हड योगदान

भांगरभूंय | प्रतिनिधी

सुलक्षणा सावंत : दिवचले महिला खेळां मेळाव्याक उत्स्फूर्त प्रतिसाद

भांगरभूंय । प्रतिनिधी

दिवचल : आयची बायल आधुनीक युगांत सगळ्याच मळांचेर पावलां मारतात. ग्रामीण वाठारांत लेगीत बायलां विवीध मळांचेर फुडें वतना दिसता. भलायकी, नातेसंबंद, करिअर आनी स्वावलंबन हे बाबतींत योग्य समन्वय सादून बायलांक उंच उड्डाण घेवपा खातीर आदाराची, समन्वयाची भुमिका म्हत्वाची आसा. तातूंतल्यान स्त्रीशक्ती सुमारा भायलें येस मेळयतली, अशें भाजप फुडारी सुलक्षणा सावंत हांणी सांगलें.

शिक्षा व्हिजन दिवचल भारतीय जतना पार्टी दिवचल मंडळा वतीन संवसारीक महिला दिसा निमतान दिवचल मतदारसंघ मर्यादीत महिला खेळां मेळावो आयोजीत केल्लो. ताच्या उक्तावण सुवाळ्यांत सुलक्षणा सावंत मुखेल सोयरी म्हूण उलयताली. ह्या वेळार माचयेर आमदार डॉ. चंद्रकांत शेट्ये, डॉ. गीता कडकडे, नगराध्यक्ष विजयकुमार नाटेकार, आदले सभापती राजेश पाटणेकार, वल्लभ साळकार, डॉ. कौस्तुभ पाटणेकार, महिला अध्यक्ष शर्मिता पळ, नगरसेवक, सरपंच, पंच आनी हेर पदाधिकारी हाजीर आशिल्ले.

बायलांक मैदानांत देंवोवन तांच्या खेळां गुणांक संद दिवपा खातीर केल्लो यत्न खूब तोखणायेचो आसा. आयज बायलो सगळ्याच मळांचेर आपलें योगदान दिता. तांकां प्रेरणा दिल्ले खातीर सुलक्षणा सावंत हांणी डॉ. चंद्रकांत शेट्ये हांकां विशेश परबीं दिली. ह्या वेळार तांणी खेळां मशाल पेटोवन खेळां मेळाव्याचें उक्तावण केलें.

डॉ. गीता काकोडे हांणी सांगलें, आयज बायलो सगळ्याच मळांचेर फुडाकार घेतात. तांणी स्वताची जतनाय घेवप गरजेचें आसा. महिला सक्षम जाली जाल्यार समाज, राष्ट्र घटमूट जावपाक मजत जातली. बायलांनी खेळां मळांत लेगीत नांव जोडलां. आयचो खेळां मेळावो बायलां खातीर एक आदर्श उपक्रम आसा, अशें तांणी स्पश्ट केलें.

डॉ. शेट्ये हांणी येवकार दिलो. बायलांक उर्बा दिवपाच्या उद्देशान हो आगळो वेगळो उपक्रम हातांत घेतिल्लो. ह्या उपक्रमांक सुमार 800 परस अदीक बायलांनी प्रतिसाद दिलो. ताका लागून खूब समाधान जालें, अशें तांणी सांगलें.

ह्या वेळार नगराध्यक्ष नाटेकार हांणी खेळगड्या बायलांक शुभेत्सा दिल्यो. राजन कडकडे आनी सायली गर्दे हांणी सुत्रसंचालन केलें. तीन दीस चलिल्ल्या ह्या महिला खेळां मेळाव्यांत विवीध सर्ती घेतिल्ल्यो. ताका व्हड प्रतिसाद मेळ्ळो.