भांगरभूंय | प्रतिनिधी
बांगलादेशांतले राजकी अस्थीरतायेक लागून बायलांची संवसारीक टी-20 क्रिकेट सर्तीतल्यो मॅची आतां युएईच्या दुबय आंतरराष्ट्रीय आनी शारजांतल्या मैदानाचेर जातल्यो. पूण, येजमानकी बांगलादेशा कडेच आसतली.सर्त 3 ते 20 ऑक्टोबर मेरेन चलतली.
फाटल्या कांय म्हयन्यां सावन बांगलादेशांत राजकी अस्थीरताय आसा. लोकांनी सरकारा आड खर आंदोलन केलें. ह्या आंदोलना उपरांत प्रधानमंत्री शेख हसिना हिणें आपल्या पदाचो राजिनामो दिवन देशांतल्यान पळ्ळी. ते उपरांत सैन्यान एक अंतरीम सरकार स्थान केली. पूण, देशांत व्यापक पांवड्यार लोकांनी हिंसा केली, सरकारी इमारतींक उजो घालो. ह्या घडणुकांचे फाटभुंयेर भारत, ऑस्ट्रेलिया, न्युझिलॅण्ड आनी इंग्लंडान आपल्या नागरिकांक बांगलादेशांत न वचपाचो सल्लो दिल्लो.
आंतरराष्ट्रीय क्रिकेट समितीची (आयसीसी) काल ऑनलायन पद्दतीन बसका जाली. बसकेंत चडश्या अधिकाऱ्यांनी सर्त दुसरे सुवातेर व्हरपाची मागणी केली.
26 ऑगस्ट सावन सरावाच्यो मॅची जातल्यो. सर्तींत 10 पंगड वांटो घेतले.
मजगतीं, सर्तीच्या आयोजना खातीर भारताचो पर्याय म्हणून विचार केल्लो. पूण, बीसीसीआयन स्पश्टपणान न्हयकार दिलो.
भारतांत सध्या पावस चालू आसा. तशेंच फुडल्या वर्सां बायलांची संवसारीक वन डे क्रिकेट सर्त लेगीत भारतांत जावपाची आसा. ताका लागून सेगीत दोन संवसारीक सर्ती आयोजीत करप योग्य थारचे ना अशें बीसीसीआयचे सचीव जय शाहान म्हणलें.
श्रीलंका आनी झिम्बाब्वे ह्या देशांच्या क्रिकेट मंडळांनी लेगीत सर्तीचें आयोजन करपाची इत्सी उक्तावन दाखयिल्ली. पूण, आयसीसीन मॅची यूएईंत खेळपाचो निर्णय घेतलो.
यूएईक संवसारीक सर्तीच्यो मॅची आयोजीत करपाचो अणभव आसा. 2021त दादल्यांची संवसारीक टी-20 सर्त भारतांत जावपाची आशिल्ली. पूण, कोरोनाक लागून उपरांत ती यूएईक स्थलांतरीक करची पडिल्ली. पूण, येजमानकी बीसीसीआय कडेनूच आशिल्ली.
भारताक अ गटांत सुवात दिल्या. ह्या गटांत स खेपेचो वस्ताद ऑस्ट्रेलिया पंगडा खेरीत पाकिस्तान, न्युझिलॅण्ड आनी पात्रताय फेरी हुपून आयिल्लो एक पंगड आसतलो.
ब गटांत येजमान बांगलादेश, इंग्लंड, दक्षीण आफ्रिका, वॅस्ट इंडीज आनी क्वॉलिफायर 2 पंगडाचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
