बायलांक समान संद हो तांचो हक्क, उपकार न्हय

भांगरभूंय | प्रतिनिधी

प्रकाश कामत :  ‘चित्रंगी’ मेळाव्याचें उक्तावण

भांगरभूंय । प्रतिनिधी

काणकोण : बायलांक समान हक्क दिवप हो तांचो हक्क, तांचेर केल्ले उपकार न्हय, अशें ज्येश्ठ पत्रकार प्रकाश कामत हांणी सांगलें.

कोंकणी भाशा मंडळान श्री नाराकार शिक्षण संस्था तशेंच श्री मल्लिकार्जून आनी श्री चेतन मंजू देसाय म्हाविद्यालयाच्या जोडपालवान माशें काणकोणां चित्रंगी मेळावो आयोजीत केला. ताचें उक्तावण केले उपरांत प्रकाश कामत उलयताले.

लोकशायेंत सर्वोच्च समजतात ते लोकसभा आनी राज्यसभेंत लेगीत बायलांचें प्रतिनिधीत्व 15 टक्क्यां परस उणें आसप ही भारतीयां खातीर लजेची गजाल. बायलांक न्याय मेळोवन दिवचे खातीर पुरक आशिल्ली पत्रकारिता आनी न्यायालयांनी लेगीत बायलांचो आंकडो वाडोवप आयच्या खिणाक गरजेचें आसा, अशें कामत हांणी सांगलें.

देशांतल्या समाज सुधारकांची वळख आमकां पाठ्यपुस्तकांतल्यान करून दिली, पूण विसाव्या शेंकड्याचे सुरवेक देवदासी प्रथे आड बंड करून पुर्तुगीज सरकाराक हे प्रथेचेर बंदी घालपाक लावपी गोंयचे समाज सुधारक राजाराम रंगाजी पैंगीणकार हांची वळख विद्यार्थ्यांक करून दिवपाक मात हें सरकार अपेसी थारलां, असो आरोप प्रशांत नायक हांणी केलो.

कोंकणी भाशा मंडळाची अध्यक्ष रत्नमाला दिवकार हांणी प्रास्ताविकांत, चित्रंगी हे माचयेचें कोंकणी चळवळींतलें योगदान अधोरेखीत केलें. शलाका देसाय हांणी सुत्रसंचालन केलें जाल्यार मंडळाचे सरचिटणीस मंगलदास भट हांणी उपकार मानले.

मेळाव्याच्या पयल्या दिसा उक्तावण कार्यावळी भायर आदले न्यायाधीश सायनोरा तेलीश लाड हांची ‘बायलांचें सक्षमीकरण कायदे आनी उणाव’ ह्या विशयाचेर मुलाखत संगिता नायक हांणी घेतली. ते उपरांत घरकाराच्या मरणा उपरांत ताचे चितेक अग्नी दिवपी प्रतिक्षा प्रभाकर साळगांवकार आनी घरकाराच्या मरणा उपरांत आपले चलयेचें कन्यादान करपी उषा योगीराज नायक हांकां अभिमान पत्र दिवन तांचो भोवमान केलो.

‘वेंचणुकेंत 33 टक्के राखिवता योग्य बायलांक संद’ ह्या विशयाचेर जाल्ल्या परिसंवादांत सिसील रॉड्रिग्स, सियोला व्हाज आनी रेश्मा बांदोडकार हांणी आपले विचार मांडले. ‘समाजीक वावरांत बायलांचो वांटो’ ह्या विशया वयल्या परिसंवादांत तलुला डिसिल्वा, मॅलिसा सिमोईश आनी सुलक्षा गांवस हांणी वांटो घेतलो.