भांगरभूंय | प्रतिनिधी
प्रस्ताव वित्त खात्या कडेन; कदंबा अधिकाऱ्याची म्हायती
भांगरभूंय । प्रतिनिधी
पणजी : खाजगी मळार काम करपी बायलांक हाफ तिकेट दिवपाचो प्रस्ताव वित्त खात्या कडेन धाडला. ह्या प्रस्तावाक मान्यताय दिवपाची प्रक्रिया सुरू आसा. हे येवजणे खातीर वित्त खात्या कडल्यान अतिरिक्त 40 कोटी रुपयांची तजवीज करपाची मागणी केल्या, अशी म्हायती कदंब येरादारी म्हामंडळाच्या वरिश्ठ अधिकाऱ्यान दिली.
गोंयांत खासगी मळार काम करपी तरणाटी चली आनी बायलांक म्हजी बस येवजणे वरवीं बस येरादारींत 50 टक्के सूट मेळटली, अशी घोशणा ‘म्हजी बस’ हे सुदारीत येवजणेच्या उक्तावणा वेळार केल्ली. पूण मुख्यमंत्र्यान केल्ले हे घोशणेक एक म्हयनो मायज जालो, पूण अजून मेरेन ही येवजण अस्तित्वांत येवंक ना.
फक्त खाजगी मळार काम करपी बायलांकूच न्हय, जाल्यार एप्रेन्टीशीप करपी तशेंच गोंय मनीस बळ उदरगत म्हामंडळांत काम करपी बायलांक हाल्फ तिकेटीचो लाव दिवपाचो प्रस्ताव आशिल्लो. मुख्यमंत्र्यान दिल्ल्या निर्देशा प्रमाण कदंब येरादारी म्हामंडळान ह्या प्रस्तावाचो मसुदो तयार करपाची प्रक्रिया चालीक लायल्ली.
ही येवजणे अस्तिवात केन्ना येतली असो प्रस्न कदंब येरादारी म्हामंडळाचे वरिश्ठ अधिकाऱ्यांक विचारल्यार तांणी सांगलें, 50 टक्के सूट दिवपाचो मसुदो तयार जाला आनी येरादारी खात्यान तो मान्यताये खातीर वित्त खात्या कडेन धाडला.
हो मसुदो सध्या वित्त खात्या कडेन आसा आनी अजून मेरेन ह्या प्रस्तावाक मान्यताय मेळूंक ना. ह्या मसुद्याची प्रक्रिया खंय पावल्या हे जाणून घेवपा खातीर आमी फाठपुरवण करतात. येता त्या सोमारा आमी परतून ह्या मसुद्या विशीं वित्त खात्या कडेन चवकशी करपाचे आसात, अशी म्हायती अधिकाऱ्यान दिली. ही येवजण चालीक लावपा खातीर ह्या अर्थीक वर्सांत आमी वित्त खात्या कडल्यान 170 कोटी रुपयांची अर्थीक तजवीज करपाची मागणी केल्या. सध्या कर्मचाऱ्यांचो पगार आनी हेर खर्च धरून कदंब येरादारी म्हामंडळाक 130 कोटी रुपया वर्साक खर्च येता. देखून ही येवजण चालीक लावपा खातीर आमी अतिरिक्त 40 कोटी रुपया मंजूर करपाक सांगलां, अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
