भांगरभूंय | प्रतिनिधी
गोंय बायलां आयोगा वतीन बायल दिसा निमतान कार्यावळ
पणजीः लैंगीक शोशण प्रतिबंध (पॉश) कायदो फक्त कायदेशीर आदेश न्हय तर दरेक कामाचे सुवातेर बायलांक आस्पावन घेवन प्रतिश्ठा आनी समानतेची संस्कृती तयार करपा खातीर मार्गदर्शक आराखडो जावन आसा. पॉश कायद्याचे अंतर कागाळ समिती (आयसी) वांगडी ह्या बदलाचें फुडारपण करतात, अशें पॉश कायद्याची तज्ञ अश्विनी पटवर्धन हांणी सांगलें.
गोंय राज्य बायल आयोग हांचें अंतरराष्ट्रीय बायल दिसा निमतान खासा कार्यावळी पणजेच्या इन्स्टीट्युट मिनेझीस ब्रांगाझांत घडोवन हाडिल्ली. हे कार्यावळींत बायलांची भलायकी, तांचें कल्याण आनी कामाचे सुवातेर सुरक्षा ह्या गजालींचे भर दिलो. ह्या वेळार शिवोलेची आमदार डिलायला लोबो, अर्थीक गुन्यांव फांट्याची पुलीस अधिक्षक आर्शी आदील, प्रशिक्षण पुलीस अधिक्षक सुचेता देसाय, गोंय राज्य बायलां आयोगाची अध्यक्ष रंजिता पै आनी आयोगाची वांगडी सचीव उपासना माजगांवकार हजर आशिल्लीं.
ह्या वेळार पॉश कायद्याची जागृताय करपा खातीर एक खासा सत्र जालें आनी ह्या सत्रांत सर्वम हे संस्थेची संस्थापक अश्विनी पटवर्धन हांणी मार्गदर्शन केलें. हजर आशिल्ल्या सगल्यांक पॉश झुजारी जावपाचो उलो मारून गोंय तशेंच देशांत बायलां खातीर आस्पावन घेवपी आनी सुरक्षीत कामाची सुवात दिवपाक सर्वम हांणी सुरू केल्ले चळवळींत वांटेकार जावचें, असो उलो मारलो.
ह्या सत्रांत विविधी सराकारी खात्यांतल्या ६० आयसी वांगड्यांक तांची भुमिका आनी जापसालदारकी समजावन सांगून गार्हाणी प्रक्रीया आनी निपक्ष चौकशी हे विशीं म्हायती दिली. तशेंच राज्यांतल्या १६ महाविद्यालयांतल्या २१०० विद्यार्थ्यांनी हे कार्यावळींत वांटो घेतलो.
आपलें येवकाराचें भाशण करतना रंजीता पै हांणी सांगलें, गोंय राज्य बायलां आयोगान देवी अहिल्याबाई होळकर हांची ३००वी जयंती मनोवन तांचे ताकद, फुडारपण आनी तांचे दुरदश्टीक मान दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
