भांगरभूंय | प्रतिनिधी
पणजीः तंत्रगीन्यानांत जाण्टे आनी भुरग्यां मदले अंतर कमी करून गांवगिर्या वाठारांतल्या बायलांक तंत्रगीन्यानांत १०० टक्के साक्षर करपाची मोख आमी दवरल्या. तशेंच नवी सुदारीत होम स्टे येवजणे वरवीं गांवगिर्या वाठारांत होम स्टे उबारपा खातीर सरकारान दोन लाख इतलें अनुदान दिता, अशी म्हायती पर्यटन तशेंच म्हायती आनी तंत्रगीन्यान मंत्री रोहन खंवटे हांणी सांगलें.
म्हायती आनी तंत्रगीन्यान खात्यान पणजे होमस्टे, ब्रेड एन्ड ब्रेकफास्ट येवजण आनी महीला डिजीटल सशक्तीकरण येवजणे विशींची जागरूकताय आनी प्रशिक्षण कार्यावळ घडोवण हाडिल्ली. हे कार्यावळीच्या उक्तावणा वेळार पर्यटन मंत्री रोहन खंवटे उलयताले. ह्या वेळार म्हायती आनी तंत्रक्षगीन्यान खात्याचे संचालक कबीर शिरगांवकार, पर्यटन खात्याचे संचालक केदार नायक आनी हेर मानेस्त हजर आशिल्ले.
ह्या वेळार उलयतना मंत्री रोहन खंवटे हांणी सांगलें, विकसीत गोंय २०३७ साध्य करपा खातीर अत्याोंदय तत्वाचेर आमका तंत्रगीन्यान हे ग्रामीण भागातल्या निमण्या मनशा मेरेन पावपाचो आमचो यत्न आसा.
जाण्ट्या बायलांक फकत मोबायल म्हटलो काय फकत फोन आनी व्हॉटसेप ह्यो दोनूच गजाली कळटात. मात तंत्रीगन्याच्या आदारा बगर बायलां फुडें सरपाक शकना. तंत्रगीन्याना वरवीं तुमी घरां तयार केल्लें उत्पादन स्वता ऑनलायन माचयेचेर विकपाक शकतात. हे खातीर डिजीटल सशक्तीकरण करपाची गरज आसा, अशें खंवटे हांणी म्हणलें.
भुरगे आनी जाण्ट्यां मदले जे डिजीटल अंतर आसा ते आमकां कमी करपाक जाय. आमी गांवां गांवांनी वचून तांकां शिकोवन आमकां बायलांक तंत्रगन्यान्यात १०० टक्के साक्षर करप ही आमची मोख आसा. बायलां डिजीटल सशक्तीकरणा वरवीं आमी गांवगिर्या तशेंच हेर भागांतल्या बायलां खातीर अभ्यासक्रम सुरू करतात, अशें खंवटे हांणी म्हणलें.
होम स्टे येवजणेंत पयलीं लावर्थ्यांक स्वता पयलीं पयशे मोडचे पडटाले. मात उपरांत ते पयशे सरकाराक तांकां फारीक करचे पडटले. मात आतां हे येवजणेंत सुदारणा करून सरकार फुड्यांत आतां २ लाख रुपया दिता आनी हे पयशे होमस्टे बांदपा खातीर कशेय तरेन वापरपाक मेळटा. सरकाराची हातूंत कसलीच मर्यादा ना, अशी म्हायती खंवटे हांणी दिली.
आमी होम स्टे येवजणे ही खासा काणकोण, दिवचल, पेडणें म्हालांतल्या गांवगीर्या वाठारांत हाडिल्ली आसा. दर्यादेगेर होटेला, होमस्टे सगळे तरांची सुविधा आसात. मात ग्रामीण भागांत जेन्ना आमी दर्या पल्तडीं गोंय ही संकल्पना राबयली तेन्ना गांवांनी रावपाची वेवस्था नाशिल्ली आनी ह्या कारणांक लागून आमी होम स्टे येवजणेची सुरवात केल्या, अशें खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
