भांगरभूंय | प्रतिनिधी
पॅरीस, खबरां संस्था ः बायलांक गर्भपात करपाचो अधिकार आसूंक जाय काय ना? गर्भपात कायदेशीर काय बेकायदेशीर? गर्भपात केल्यार मनशाच्या हक्कांचो भंग जाता काय ना? अशा जायत्या प्रस्नांचेर संवसारभर चर्चा सुरू आसतना फ्रांसान सोमारा (4 मार्च) दोनूय सर्वोच्च सभाघरांच्या संयुक्त अधिवेशनांत हे संबंदी इतिहासीक विधेयकाक मान्यताय दिली. देखून बायलांक गर्भपात करपाचो घटनात्मक हक्क दिवपी फ्रांस हो संवसारांतलो पयलो आनी एकमेव देश थारलो. फ्रांस संसदेच्या दोनूय सभाघरांच्या संयुक्त बसके मुखार राष्ट्राध्यक्ष इमॅन्युएल मॅक्रॉन हांणी हे संबंदी प्रस्ताव मांडिल्लो.
फ्रांसांतल्या पॅलेस ऑफ व्हर्सेलीसांत ह्या प्रस्तावाचेर मतदान करपा खातीर दोनूय सभाघरांचे वांगडी पुराय प्रमाणांत हाजीर आशिल्ले. ह्या अधिवेशनांत बायलांक गर्भपात करपाचो घटनात्मक हक्क दिवपी थारावाक 780 विरुद्ध 72 ह्या फरकान मान्यताय मेळ्ळी.
मजगतीं, फ्रान्स राज्यघटनेच्या 34 कलमांत दुरुस्ती करून बायलांक गर्भपात करपाचो अधिकार दिवपाचें विधेयक मांडलें. नॅशनल असेम्ब्ली आनी सिनेट ह्या फ्रान्सच्या संसदेत दोनूय घरांनी स्वतंत्रपणान भोवमतान हें दुरुस्ती विधेयक संमत केलें.
बायलांक गर्भपात करपाचो घटनात्मक अधिकार दिवपी फ्रांस हो संवसारांतलो एकमेव आनी पयलो देश थारलो. हाचे प्रमाण बायलांक गर्भपात करपाचो निर्णय घेवपाचें पुराय स्वातंत्र्य मेळटा. हाचे पयलीं 1974 वर्साच्या आदल्या युगोस्लाव्हियाच्या राज्यघटनेत खंयच्याय मनशाक भुरगीं जावपा संबंदी निर्णयाचे स्वातंत्र्य दिल्लें. फुडें 90 च्या दशकांत युगोस्लाव्हियाचे विघटन जालें. पूण तातूंतल्यान भायर सरपी प्रांतांनीय तेंच धोरण सांबाळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
