भांगरभूंय | प्रतिनिधी
केपें: बायलांक मार्केट मेळोवपा खातीर मुख्यमंत्र्यां वतीन ई मार्केट सुविधा उपलब्ध करून दितले अशें समाज कल्याण मंत्री सुभाष फळदेसाय हांणी सांगलें. ते केप्यां अटल ग्राम येवजणे वतीन आयोजीत केल्ल्या माटोळी साहित्याचो शुभारंभ केले उपरांत उलयताले.
ह्या वेळार केपेंचे आमदार अॅल्टन डिकॉस्टा, जिल्हो पंचायत वांगडी संजना वेळीप, सुरेश केपकार, सरपंच भुपेंद्र गांवस देसाय, प्रसाद फळदेसाय, आलिन्डा लासेन्डा, जेकिना डायस, सुभाष वेळीप, संतोष फळदेसाय, दिपाली नायक, निता फळदेसाय आनी हेर मानेस्त हाजीर आशिल्ले.
तांणी मुखार उलयतना म्हणलें, गांवगिऱ्या वाठारांतल्या लोकांक प्रोत्साहन मेळप गरजेचें आसा. 3 हजारां परस चड बायलां हे संस्थे कडेन निगडीत आसात. 300 परस चड ग्रुप आसात. तशेंच वेव्हारीक ज्ञान बायलांक मेळप गरजेचें अशें फळदेसाय हांणी म्हणलें.
खंयचेय गजालीचेर विस्वास दवरलो जाल्यार मुखार वचूंक शकतात. विदेशांतल्यान खूबश लोक गोंयांत येतात. तेन्ना पांच नखेत्री सारक्या हॉटेलांनी अशीं स्टॉलां घालूंक जाय. राजकारणाक लागून आमचे मदीं फूट पाडटात आनी देव धर्मा मुखार येता अशें जावचें न्हय. चवथ, क्रिस्मस वा ईद ह्यो परबो आमी गोंयकारांनी एकवटान मुखार व्हरूंक जाय. सगल्यांनी एकवट दाखयत जाल्यारूच आमचो गांव, मतदारसंघ, राज्य, देश मुखार वतलो अशें सुभाष फळदेसाय हांणी म्हणलें.
केपेंचो मतदार मुखार वचपा खातीर मंत्री म्हूण सुभाष फळदेसाय हांचो हांव सल्लो घेतां. परब मनयतना देवाची शिकवण ही आमी आत्मसात करून त्या मार्गान वाटचाल केली. गणपतीन आमकां सैम सांबाळपाचो संदेश दिला आनी हे खातीर पर्यावरण सांबाळप गरजेचें आसा अशें केपेंचे आमदार एल्टन डिकॉस्टा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
