भांगरभूंय | प्रतिनिधी
मुरगांव: तियात्र अकादमी गोंय वतीन बायणा वास्को हांगा आयोजीत केल्ल्या तियात्र महोत्सवाचें उक्तावण मुरगांवच्यो नगरसेविका शमी कृष्णा साळकार हांचे हस्तुकीं जालें. ह्या महोत्सवांत रवींद्र भवनांत ‘गोवा सुधारोप’ वतीन पुरुमेंताचे फेस्त आयोजीत केलें. ह्या फेस्ताचेंय उक्तावण शमी साळकार हांणी केलें.
ह्या वेळार गोंय तियात्र अकादमीचे अध्यक्ष अँथनी बार्बोझा आनी रवींद्र भवनाचे अध्यक्ष जयंत जाधव, उपाध्यक्ष डॉ. धर्मेंद्र प्रभुदेसाय, जिल्हो पंचायत वांगडी अॅड. अनिता थोरात, गोंय तियात्र अकादमीचे पदाधिकारी आनी रवींद्र भवनाचे वांगडी हाजीर आशिल्ले.
उक्तावण सुवाळ्या उपरांत सांजवेळा माजोड्डेंच्या डॉम्नीक कार्व्हालो हांचे ‘आमकां बाळगून दोवोर’ हें तियात्र सादर केलें. तशेंच मोरजेच्या जॉन अलेक्झांडर फर्नांडीस हांचे ‘बारा ब्रेस्तार तेरा सुक्रार’ हें तियात्र सादर केलें. फादर आग्नेल सेंट्रल स्कूल पिलारच्या गोवन कॉम सोशियो अॅण्ड कल्चरल असोसिएशनाच्या फादर मिल्टन रॉड्रिग्ज आनी शांताराम पवार हांचे ‘डॅडीस होम’ हें तियात्र सादर केलें.
आयज (बिरेस्तारा) दनपारां 3.30 वरांचेर हेडलॅण्ड सडा हांगासरल्या पास्कॉल फर्नांडीस हांचे ‘आतां आमचें कितें जातलें’ तियात्र जाल्यार शुक्रारा सांजवेळा 4 वरांचेर डोंगरी राय हांगासरल्या डोमिंगोस फर्नांडीस हांच्या ‘सायबीण माय चुकली आमी’ ह्या तियात्र सादर जावन महोत्सवाची सांगता जातली. हो तियात्र महोत्सव सगल्यां खातीर उक्तो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
