भांगरभूंय | प्रतिनिधी
वास्कोः सध्या तात्पुरती बायणा रविंद्र भवनांत आशिल्लीं उपजिल्होधिकारी आनी दंडाधिकारी हांचीं कार्यालयां आदल्या मुरगांव नगरपालिका प्रशासकीय इमारतीच्या तळमजल्यार व्हरतले. हे खातीर मुरगांव पालिका म्हामंडळान उल्लेख केल्ल्या जाग्याचो ताबो 3 नोव्हेंबर मेरेन दंडाधिकारी कार्यालया कडेन दिवचो. दंडाधिकारी प्रवीणजय पंडित हांणी मुरगांव नगरपालिकेचे मुखेल अधिकारी सिद्धिविनायक नायक हांकां पत्र धाडलां.
उपजिल्होधिकारी आनी दंडाधिकारी कार्यालयांचें काम 16 डिसेंबर सावन आदल्या मुरगांव नगरपालिका इमारतींतल्यान पुराय तांकीन करूं येता अशें पत्रांत स्पश्ट केलां. रविंद्र भवनाचे अध्यक्ष जयंत जाधव हांणी हे संबंदी समाधान उक्तायलां.
उल्लेख केल्लीं कार्यालयां थंयच्यान स्थलांतरीत केल्यार आमकां आर्ट गॅलरीचो वापर करपाक मेळटलो अशें तांणी सांगलें. तळमजल्याचेर आशिल्लीं मुरगांव उपजिल्होधिकारी आनी दंडाधिकारी कार्यालयां नोव्हेंबर 2021 वर्सा मुरगांव नगरपालिका कार्यालय इमारतीची दुरुस्ती आनी नवनिर्माण कामां खातीर बायणारवींद्र भवनांत स्थलांतरीत केल्लीं.
दंडाधिकाऱ्याचें कार्यालय रविंद्र भवनाच्या आर्ट गॅलरींत दवरलां, जाल्यार उपजिल्होधिकारी कार्यालय कॅन्टीन आनी हेर वाठारांनी दवरलां. हाका लागून रविंद्र भवनांत आर्ट गॅलरी वापरपाक शकले ना. तशेंच थंय वास्को सिटी भलायकी केंद्राचीय सुरवात जाली. ताका लागून रवींद्र भवनाच्या एकंदर कार्यपद्दतीचेर परिणाम जावंक लागलो.
ह्या प्रकरणांत जयंत जाधव हांणी सेगीत फालोअप केल्या उपरांत निमाणे भलायकी मंत्री विश्वजीत राणे हांणी भलायकी केंद्राचें वेवस्थापन थंय स्थलांतरीत करपाचें आश्वासन दिल्लें. ते प्रमाण थंयच्या भलायकी केंद्राचें वेवस्थापन स्थलांतरीत केलें.
पूण उपजिल्होधिकारी आनी दंडाधिकारी कार्यालयां थंयच उरतात. मुरगांव नगरपालिका प्रशासकीय कार्यालय इमारतीची दुरुस्ती आनी जीर्णोध्दार काम पुराय जाले उपरांत लेगीत मुरगांव पालिकेंत तीं दोनूय कार्यालयां थंय दवरूंक नाशिल्लीं.
एके वटेन मुरगांव नगरपालिका त्या कार्यालयां खातीर सुवात मेळोवपाची उमेद नाशिल्ली जाल्यार दुसरे वटेन रविंद्र भवनान तीं कार्यालयां थंयच्यान स्थलांतरीत करपाचो आग्रह धरिल्लो. मुरगांवचे नगराध्यक्ष गिरीश बोरकार हांणी एमओयूचेर सय केल्या उपरांत त्या कार्यालयां खातीर सुवात मेळटली अशें सांगिल्लें.
आतां त्या कार्यालयांक मूळ मुरगांव नगरपालिका प्रशासकीय कार्यालय इमारतींत स्थलांतरीत करपाची प्रक्रिया सुरू जाल्या. मुरगांव मामेलदार कार्यालय थंय व्हरचे पयलीं थंय वातानुकूलीत यंत्रणा बसोवपाची गरज आसा. ते खातीर मुरगांव नगरपालिकेन भौशीक बांदकाम खात्याक हरकत ना प्रमाणपत्र सादर करपाची गरज आसा. हरकत ना प्रमाणपत्र मेळ्ळ्या उपरांत वातानुकूलीत प्रणाली बसोवपाच्या खर्चाचो नियाळ घेतले अशें जुलय 2025 वर्सा धाडिल्ल्या पत्रांत सांगिल्लें.
आतां ह्या प्रकरणांत 28 ऑक्टोबराक मडगांवच्या दक्षिण गोंय जिल्लो कार्यालयांत अतिरिक्त जिल्होधिकाऱ्यान आपयल्ली बसका घेवन आदल्या मुरगांव नगरपालिकेच्या इमारतीच्या तळमजल्या वयल्यान मुरगांव दंडाधिकारी आनी उपदंडाधिकारी कार्यालयांचें प्रशासन 16 डिसेंबर सावन सुरू करपाचो निर्णय घेतलो. ते प्रमाण मुरगांव पालिका म्हामंडळाक जागो ताब्यांत दिवपाची विनंती केल्या.
3 नोव्हेंबराक जागो ताब्यांत घेतले उपरांत रविंद्र भवनांतल्यान कागदपत्रां आनी हेर साहित्य स्थलांतरीत करपाचें काम सुरू जातलें. रवींद्र भवनांत उल्लेख केल्लीं कार्यालयां स्थापन जाल्ल्यान गरजेवंत नागरिकांक थंय कामाक येवपाक कांय असुविधा निर्माण जावपाक लागल्यो. उपदंडाधिकारी आनी दंडाधिकारी कार्यालयां रविंद्र भवनांत स्थलांतरीत केल्ल्यान आमकां, आमच्या गिरायकांक आनी सामान्य नागरिकांक वेगवेगळ्या अडचणींक तोंड दिवचें पडटा, देखून वास्को वकील संघटणेन उल्लेख केल्लीं कार्यालयां आदल्या पालिका म्हामंडळ इमारतींत स्थलांतरीत करपा संबंदी आमदार कृष्णा साळकाराक प्रतिनिधीत्व सादर केल्लें.
रविंद्र भवनांत कार्यालयां आशिल्ल्यान थंय गाडयो उबीं करपाक फावो ती सुवात मेळटाली. तेच प्रमाण थंयच्या वॉशरूमाचो वापर नागरिकांक करपाक मेळटालो. पूण हाका लागून रवींद्र भवनाक कांय असुविधांचो सामना करचो पडलो.
थळाव्या कलाकारां खातीर तांकां आपली सुवात पुरायपणान वापरूंक मेळ्ळी ना. आमच्या आर्ट गॅलरीचीं कार्यालयां जगतात आशिल्ल्यान रवींद्र भवना भायर उक्त्या सुवातेर थळाव्या कलाकारांच्या कलाकृतींचीं प्रदर्शनां घडोवन हाडचीं पडलीं अशें जाधव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
