भांगरभूंय | प्रतिनिधी
वास्को, प्रतिनिधी : बायणाच्या नुस्तें मार्केटाची दुरुस्ती करपा खातीर हालचाली सुरू जाल्यात. मुरगांवचे मुख्याधिकारी दिपेश प्रियोळकार हांचे सयत थळावे नगरसेवक दीपक नायक हांणी ह्या मार्केटाची पळोवणी केली. मार्केटाची अवस्था सामकी वायट जाल्ल्यान हातूंत दोन- तीन नस्तें विक्रतें सोडून हेरांनी आपलो वेवसाय रस्त्यांचेर मांडला. ताका लागून रस्त्यांचेर येरादारीक आडखळ निर्माण जाल्या. आतां मुरगांव पालिकेन ह्या मार्केटाची दुरुस्ती करपाचें थारायिल्ल्यान मार्केटांतल्या विक्रेत्यांनी समाधान उक्तायलां. ह्या मार्केटाचे अवस्थे विशीं ‘भांगरभूंय’ दिसाळ्यांत हालींच बातमी आयिल्ली.
हें मार्केट आदीं सामकें रिकामें आशिल्लें. तेन्नाचे आमदार मान्युअल वाझ हांणी बायणाच्या विवीध रस्त्यां कुशीक बसपी सगळ्या विक्रेत्यांक थंयच्यान काडून तांची वेवस्था ह्या मार्केटांत केल्ली. ह्या मार्केटाची तांणी दुरुस्ती केल्ली. ह्या मार्केटांत आनी भाजी, नुस्तें, नाल्ल विकपा खातीर बसताले. ताका लागून ह्या मार्केटांत गिरायकांची गर्दी जाताली.
मुरगांव पालिकेन हें मार्केट सांबाळपा कडेन लक्ष दिवंक नाशिल्ल्या हाची अशी अवस्था जाली. ताका लागून विक्रेत्यांनी एकतर आपलो वेवसाय बंद केलो वा रस्त्या कुशीक तो सुरु केलो. म्हणून गिरायकांनी मार्केटांत येवपाचें बंद केलें. ह्या मार्केटाच्या पांख्याची सामकी वायट अवस्था जाल्या. ह्या मार्केटाक कसलीच सुरक्षा नाशिल्लयन नुस्तें चोरिल्ल्याचें प्रमाण वाडलां.
ह्या मार्केटाचे अवस्थेची दखल घेतना नगरसेवक दीपक नायक हांणी मुख्याधिकाऱ्यां सयत पळोवणी केली. ह्या मार्केटाच्या जाग्यार नवी इमारत बांदपा खातीर कांय आडखळी आसात त्यो पयस जाले उपरांत थंय नवें मार्केट बांदतले. ताचे पयलीं ह्या मार्केटाची दुरुस्ती करतले. बायणाच्या रस्त्या कुशीक बसप विवीध विक्रेत्यांची ह्या मार्केटांत वेवस्था करतले. हाका लागून येरादारीक जावपी आडखळ पयस जावपाक मजत जातली अशें दीपक नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
