भांगरभूंय | प्रतिनिधी
मंत्री निलेश काब्राल हांणी केली पळोवणी
भांगरभूंय । प्रतिनिधी
मुरगांवः बायणा दर्यांत घाणयारे उदक सोडिल्ल्यान गैरसोय जाता हे खातीर मुरगांवचे आमदार संकल्प आमोणकार हांणी भौशीक बांदकाम मंत्री निलेश काब्राल हांकां बायणाच्या घाणयाऱ्या उदकाचेर प्रक्रिया क रपी प्रकल्पाची पळोवणी करपाक आपयिल्लें. ताका लागून बायणाच्या परंपरीक नुस्तेमारांनी आमदार आमोणकार हांचे उपकार मानल्यात. मंत्री काब्राल हांणी सोमारा 6 मार्चाक घडणुक थळाचेर वचून पळोवणी केली.
बायणाच्या घाणयाऱ्या उदकाचेर प्रक्रिया करपी प्रकल्पा कुशीक दोंगराळ वाठारांतले घाणयारें उदक दर्यांत सोडपाच्या प्रकारांत वाड जाल्या. तशेंच घाणयाऱ्या उदकाचेर प्रक्रिया करपी प्रकल्पांतलीय घाण दर्यांत सोडटात, अश्यो थळाव्या नुस्तेकार भावांच्यो कागाळी वाडल्यात. वास्को शारांत स पंपींग स्टेशनां आसात. शारांतलें घाणयारें उदक पपींग स्टेशनांतल्यान पंपींग करून बायणाच्या घाणयाऱ्या उदकाचेर प्रक्रिया करपी प्रकल्पांत ओडूंन घेवन प्रक्रिया करतात. मजगतीं, ह्या प्रकल्पांतली घाणयाऱ्या उदकांतली घाण दर्यांत सोडटात, ताका लागून दर्याच्या उदकाक घाणी मारतात, अशी कागाळ थळाव्या नुस्तेकारांनी थळावे आमदार आमोणकार हांचे कडेन केल्ली.
मंत्री काब्राल हांणी आमदार आमोणकार आनी थळावे नुस्तेकार तशेंच संबंदीत अधिकाऱ्यां वांगडा ह्या प्रकल्पाची तशेंच ह्या वाठाराची जोडरितीन पळोवणी केली. त्या वेळार दोंगराळ वाठारांतलें घाणयारें उदक बायणाच्या दर्यांत सोडटात, तेचवरी घाणयाऱ्या उदकाचेर प्रक्रिया करपी प्रकल्पांतली घाण लेगीत दर्यांत सोडटात, हें नदरेक पडलें.
घाणयारें उदक दर्यांत सोडचें न्हय हे खातीर गरजेचीं पावलां उखलचीं, अशी मागणी आमोणकार हांणी मंत्री काब्राल हांचे कडेन केली. ह्या प्रकाराचेर खर नदर दवरचे खातीर सीसीटीव्ही कॅमेरा बसोवपा सयत हेर पावलां उखलतले, अशें मंत्री काब्राल हांणी आस्वासन दिलां. तशेंच घाणयारें उदक दर्यांत सोडटात असो दुबाल आयल्यार लेगीत कागाळ करचे खातीर मंत्री काब्राल हांणी आपलो वैयक्तीक फोन नंबर थळाव्या नुस्तेमारांक दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
