भांगरभूंय | प्रतिनिधी
पणजी : बायणा दरोडो प्रकरणांतलो मास्टर मायंड त्या कुटुंबाच्या दुकानांत कामाक आशिल्लो. फुडाराक असले गुन्यांव आडावपा खातीर गोंय पुलिसांनी प्रतिबंधात्मक उपाय येवजण्यो सुरू केल्यात. हे प्रमाण नाकाबंदी वाडयल्या. भाडेंकार, कामगार व्हॅरिफिकेशना विशीं लोकां मदीं जागृताय केल्ल्याचें पुलीस महासंचालक आलोक कुमार हांणी सांगलें. बिरेस्तारा पणजे जाल्ले पत्रकार परिशदेंत ते उलयताले. ह्या वेळार पुलीस उमहानिरीक्षक वर्षा शर्मा, अधीक्षक हरीश मडकयकार, टिकम सिंग वर्मा आनी हेर अधिकारी हाजीर आशिल्ले.
आलोक कुमार हांणी सांगलें : दरोडो प्रकरणांत स जाणांक अटक केल्या. सगले दुबावीत ओडिशाचे. महाराष्ट्र पुलिसांचे मजतीन दुबावितांक कल्याण, भिवंडी वाठारांतल्यान अटक केली. आनीक एक दुबावीत आसपाची शक्यताय आसा. हे विशीं अदीक तपास सुरू आसा. दरोड्यांत चोरिल्लो चडसो माल परत मेळ्ळा. हातूंत भांगरां, रुप्याच्यो वस्ती, आयदणांचो आसपाव आसा. पुलिसांनी चोरयेचे सुवातेर मेळिल्लें मास्क, सीसीटीव्ही फुटेज, तांत्रिीक सर्व्हिलंस आनी हेर गजाली वापरून ह्या प्रकरणाचो छडो लायला.
तांणी म्हणलें, बायणा प्रकरणांत कुटुंबीयांनी चोरयेचो मास्टर मायंड आशिल्ल्या कामगाराचें व्हॅरिफिकेशन करूंक नाशिल्लें. खुबशे लोक बिराडकारांची वा कामगारांचें व्हॅरिफिकेशन करिनात. हाका लागून अशी घडणूक घडल्यार गुन्यांवकारांचो सोद घेवपाक वेळ लागता. सगल्यांनी आपले बिराडकार तशेंच कामगारांचें व्हॅरिफिकेशन करप गरजेचें. पुलीस आनी सामान्य जनते मदीं संवाद आसचो म्हणून विवीध उपाय येवजण्यो आसात. ह्यान फुडें त्यो आनीक प्रभावीपणान राबयतले. तशेंच रातच्या वेळार नाकाबंदीय वाडयतले.
पुजा नायकाच्या आरोपांत मात पसून सत ना
पयशे घेवन नोकरी दिल्या अशें म्हणपी पुजा नायक प्रकरणांतली चवकशी निमाण्या टप्प्यांत आसा. तिणें केल्ल्या आरोपांत कसलेच तरेचें सत ना, हें सामकें स्पश्ट जालां. हे विशीं चवकशी पुराय जाली काय अदीक म्हायती दितले, अशें आलोक कुमार हांणी सांगलें.
ग्रँड व्हिटारा जप्त
हरीश मडकयकार हांणी सांगलें : सांताक्रुझ चोरी प्रकरणांत लोकेश सुतार (३१, महाराष्ट्र) हाका अटक केल्या. ह्या चोरयेच्या पयशांतल्यान तांणी विकत घेतिल्ली ग्रँड व्हिटारा गाडी जप्त केली. ह्या प्रकरणांत चोरिल्लें भांगर सुवर्णकारान विकलां. तेंय बेगीनूच परत मेळटलें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
