भांगरभूंय | प्रतिनिधी
एसी मोडिल्ल्यान कार्यावळी बंद; कर्मचारी जाल्यात घरजावंय
भांगरभूंय । प्रतिनिधी
मुरगांवः फाटल्या तीन वर्सां सावन सांस्कृतीक आनी हेर कार्यावळीं खातीर बायणाचें रवींद्र भवन बंद आसा. सध्या थंय सरकारी आस्थापना चलतात. कोरोना काळा उपरांत भोवतेक सगळ्याच रवींद्र भवनांनी सांस्कृतीक कार्यावळींक सुरवात जाल्या. पूण बायणाचें रवींद्र भवन मात ताका आडवाद. तें बंद आसपा फाटलें मुखेल कारण म्हणल्यार तातूंतली एसी यंत्रणा बंद पडल्या. ताचे दुरुस्ती खातीरची फायल अजून सरकार दरबारांत धुल्ल खाता. रवींद्र भवनांतली सगळीच एसी यंत्रणा कळमेल्या. आतां ती दुरुस्त करप म्हणल्यार सामकेंच कठीण काम, अशी म्हायती सुत्रां कडल्यान मेळ्ळ्या.
ही एसी यंत्रणा बदलपा बगर दुसरो पर्याय ना. आतां तीं बदलतले काय दुरुस्त करतले हाची कोणाकूच कल्पना ना.
एसी यंत्रणा दुरुस्त करून रोखडेंच बायणाचें रवींद्र भवन कला मोगीं खातीर उक्तें करतले, अशें स म्हयन्यां आदीं रवींद्र भवनाचे अध्यक्ष जयंत जाधव हांणी सांगिल्लें. प्रत्यक्षांत मात तशें जावंक ना. ह्या रवींद्र भवनाची आवाज येवजण वेवस्था, माचयेची सुवात, उजवाड येवजणेची वेवस्था, मेकअप रूम सगळ्याच गजालींनी दोश आसा. आतां जाल्यार तें तीन वर्सां सावन बंदूच आसा. तें जरी बंद आसलें, तरी थंयचो कर्मचारी वर्ग मात अजून थंयच आसा. संगीत वर्गांतले शिक्षक आनी हेर कर्मचाऱ्यांची दुसरे कडेन बदली करूंक नाशिल्ल्यान ते सध्या सरकाराचे घरजावंय जाल्यात, असो कला मोगी थोमणो मारतात.
सध्या हें रवींद्र भवन म्हणल्यार कचेऱ्यांचें भवन जालां. तातूंत सध्या मामलेदार, उपजिल्होधिकारी, भलायकी खात्यान ताबो घेतला. ह्यो कचेऱ्यो थंय आनीक कितलो तेंप आसतल्यो, हें कोणूच सांगपाक शकनात. वास्को उजो पालोवपी दळाक लेगीत ह्या भवनांत सुवात जाय आशिल्ली, पूण तांची विनवणी मान्य करूंक ना. मजगतीं, रवींद्र भवन बायणाची कार्यकारिणी समितीची निवड फाटलीं दोन वर्सां जावंकूच ना. सध्या रवींद्र भवनाचे अध्यक्षपद जयंत जाधव सांबाळटा. उपाध्यक्षपदा खातीर रस्सीखेच सुरू आसा. तशेंच वांगडीपणा खातीर खूब जाण दावो करतात.
आयज मनयतले 9 वो वर्धापन दीस
रवींद्र भवन शेनवारा 10 डिसेंबराक आपलो 9वो वर्धापन दीस मनयता. ते निमतान दनपारां सत्यनारायण पुजा जातली. ते उपरांत आरती आनी तीर्थप्रसाद जातलो. सांजेच्या 6.30 वरांचेर रवींद्र भवनाच्या मिनी सभाघरांत ‘सूर निरागस हो’ ही संगिताची कार्यावळ जातली. तातूंत नवाब शेख (‘सूर नवा ध्यास नवा’ फेम) आनी नेहा कळसुळकार आजगांवकार हांचें गायन जातलें. तांकां वैभव मडगांवकार (पेटी), विशाल मडगांवकार (पखवाज), तेजस तोरसकार (तबलें), ऋषिकेश उजगांवकार (टाळ), महेंद्र मांद्रेंकार (किबोर्ट) हे कलाकार संगीतसाथ करतले. संजय सालेलकार सुत्रनिवेदन करतले. मजगतीं, नवाब खेळ हांचो रवींद्र भवना वतीन सत्कार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
