भांगरभूंय | प्रतिनिधी
दरोडेखोरांनी फ्रीज उगडून आयस्क्रीम खाल्ली
वास्को : नायक कुटुंबान बायणा-वास्कोचे सवे माळयेर तांच्या फ्लॅटांत जाल्ल्या सशस्त्र दरोड्या प्रकरणांत ‘कुटुंबाची बारीक सारीक म्हायती आशिल्लो मनीस आशिल्ल्याच दुबाव’ उक्तायला. आठ जाणांचे टोळयेन कुटुंबाचेर हल्लो करून लाखांनी रुपयांचें सामान चोरलें.
सागर नायक हांचो भाऊ प्रसाद हांणी सांगलें, हल्ल्याची क्रुरताय, अचूक वेळ आनी समन्वय पळयल्यार दरोडेखोरांक इमारतीचे रचणुकेची आनी घराच्या आराखड्याची आदीं सावन म्हायती आशिल्ली हें स्पश्ट दिसता. ते मुखेल सीसीटीव्ही पॉयंट्स चुकोवन आयले. लोक सुस्त न्हिदिल्ले आसतना तांणी अचूक वेळ सोदलो. तांणी वेवस्थीत होमवर्क केल्लो. दरोडो घालपी इमारतीचे फाटले वटेनचो, निर्जन इमारती लागसारचो एकूच मार्ग जंय सिसीटीव्ही ना ताची निवड केली. लोखणाची गेट खंय कापची, खंयच्या जनेलाक ग्रील ना आनी खंयच्या बॅडरुमांत भाव, वयनी आनी तांची धूव न्हिदल्या हें तांकां खबर आशिल्लें. तीन बेडरूम आसूनय दरोडो घालप्यांनी फकत जे कुडींत कुटूंब न्हिदिल्लें आनी जे कुडींत मोलादीक वस्ती आशिल्ल्यो तेच कुडीक लक्ष्य केलें. तांकां लॉकर, आलमार, पयशे खंय दवरल्यात हें अचूक खबर आशिल्लें अशें तांणी सांगलें.
प्रसाद हांणी तांकां चिंधी चोर अशें म्हणलें. लाखांचे मालमत्ते वांगडा त्या सगल्यांनी फ्रिज उगडून आयस्क्रीम खाली. उदकाच्यो बाटल्यो घेतल्यो. इतलेंच न्हय तर तांणी पुतणयी नक्षत्राची ’पिगी बँक’कूय चोरली. १५ वर्सां पिरायेच्या नक्षत्रान वाटयल्ल्या ५०० रुपयांच्या नोटांची पिगी बँक (मिलेर) तांणी उखल्ली. तांचे पोतयेंत भरपूर माल आशिल्लो तर तांणी तिचो मिलेर व्हेलो, अशें प्रसाद हांणी सांगलें.
पुलीस सीसीटीव्ही फुटेजीचो अभ्यास करतात. रातच्या २ वरांचेर इमारतींत प्रवेश आनी २.५५ वरांचेर पोतयो घेवन भायर सरतना ते दिसल्यात. पुलिसांनी ‘इनसायडर ऍंगल’ तपासपाक सुरवात केल्या.
१५ वर्सां पिरायेच्या नक्षत्रान दाखयलें धाडस
शेजारचे इमारतींतल्या एका जागरूक मनशान आनी १५ वर्सां पिरायेच्या नक्षत्र नायक हांणी दाखयल्ल्या धाडसान नायक कुटुंबाचो जीव वाटयलो.
दरोडेकारांनी सागर नायक, ताची बायल हर्षा आनी धूव नक्षत्राचे हातपाय बांदून, तोंडांत कपडो घालून बाल्कनींत उडयलीं. ते पुराय फ्लॅट सोदताले. तांणी फ्लॅटाक भायल्यान लॉक करून कुटुंबाक असहाय अवस्थेंत सोडलें.
काळजाच्या दुयेंसाचो त्रास आसूनय, तकलेक मार बशिल्लो आसतनाय सागर हांणी तोंडांतलो कपडो काडून मजती खातीर नेटान आरड मारली. तांचो आवाज शेजारचे इमारतींतल्या एका नागरिका मेरेन पावलो. तो बाल्कनींत आयलो तेन्ना पुराय कुटूंब बांदिल्ले अवस्थेंत, रक्तान माखिल्लें दिसलें. तांणी म्हणलें हें चित्र पळोवन आपूण भियेलों. सागर आपल्याक बेगोबेग पुलीस आनी ऍम्बुलन्स आपय सांगतालो. तांणी बेगोबेग आपल्या पुलीस इश्टाक संपर्क केलो. उपरांत पुलीस कांय मिनटांनीच घडणुके सुवातेर पावले.
मजगतीं, जखमी आसूनय नक्षत्रान आपल्या हाताक बांदिल्लो दोरो सोडोवन आवय, बापूय आनी आजयेक सोडयलीं. दार उगडपाचो यत्न केलो तेन्ना तें भायल्यान लॉक आशिल्लें.
तिणें दरोडेकारांनी वापरिल्ले तेच रांदचे कुडीच्या जनेलांतल्यान भायर सरून पांचवे माळयेवेल्या फ्लॅटा मेरेन धांव घेतली, मात तोय भायल्यान लॉक आशिल्लो. मागीर तिणें तें लॉक उगडून शेजार्यांक उठोवपाचो यत्न केलो. कोणूच उठनाशिल्ल्याचें पळोवन ती सोंपणां देंवून पयले माळयेर रावपी काकाच्या (प्रसाद) घरांत पावसर दारांचेर मारीत शेजार्यांक उठोवपाचो यत्न केलो.
प्रसाद उठतांच तिणें पुराय प्रकार सांगलो. सगल्यांनी मेळून सवे माळयेर वचून जखमी कुटुंबाक हॉस्पिटलांत व्हेलें. तेन्ना पुलीसूय घडणुके सुवातेर पावले.
डीआयजी वर्षा शर्मा : प्रकरण आव्हान म्हणून घेतलां
सशस्त्र दरोड्या उपरांत सकाळी सावनूच उच्च पांवड्यावेले पुलीस अधिकारी घडणुके सुवातेर दाखल जाले. मुरगांव म्हालांतलो हालींच्या काळांतलो हो सगल्यांत व्हड दरोडा मानतात.
वास्को आनी मुरगांव पुलीस स्टेशनाचो पंगड थंय सगल्यांत पयलीं पावलो. उपरांत मुरगांवचे उपजिल्लो पुलीस अधीक्षक गुरुदास कदम, दक्षीण गोंयचे एसपी तिकमसिंह वर्मा आनी डीआयजी वर्षा शर्मा हांणी घडणुके सुवातेची पळोवणी केली.
पुलीसांनी खुबशे तपास पंगड तयार केल्यात. वास्को पुलीस इन्स्पॅक्टर वैभव नायक आनी मुरगांव पुलीस इन्स्पॅक्टर शरीफ जॅक हांणी सायटीची जोड तपासणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
