भांगरभूंय | प्रतिनिधी
पणजी : बायंगिणी कोयर प्रकल्प पुराय तिसवाडी म्हाला खातीर उपेगी आशिल्ल्यान हो प्रकल्प जातलोच, अशें कोयर वेवस्थापन खात्याचे मंत्री बाबूश मोन्सेरात हांणी स्पश्ट केलें. दर वाडिल्ल्यान प्रकल्पाची निविदा नवी जारी करतले. निविदा जारी जावन ऑगस्ट मेरेन काम सुरू जातलें, अशेंय मंत्री बाबूश मोन्सेरात हांणी सांगलें.
कोयर वेवस्थापन मंडळाचे बसके उपरांत उलयतना मंत्री मोन्सेरात हांणी ही म्हायती दिली. मुख्यमंत्री डॉ. प्रमोद सावंत हांचे अध्यक्षतेखाला जाल्ले बसकेक पर्यावरण मंत्री अलेक्स सिक्वेरा आनी हेर अधिकारी हजर आशिल्ले.
बायंगिणी कोयर प्रक्रीया प्रकल्पाक ह्यान पयलींच सगळे तरेची मान्यताय मेळ्ळ्या. सर्वोच्च न्यायालयानूय विरोधांतल्यो याचिका भायर मारल्यात. हाका लागून आतां प्रकल्पाक विरोध करपाक अर्थ ना. पर्यावरणाचो सांबाळ करपा खतीर सगळे तरेची जतनाय घेतले, अशें तांणी मुखार सांगलें.
प्रकल्पाचो आराखडो तयार करून निविदा तीन वर्सां पयलीं जारी जाल्ली. निविदा जारी जावनूय तेन्ना काम सुरू जावंक ना. आतां दर वाडला. हाका लागून नवी निविदा जारी करतले. दोन म्हयन्यांनी निविदा जारी जावन ऑगस्ट मेरेन काम सुरू जातलें. प्रकल्प पुराय जावपाक दोन वर्सां लागतलीं. भारतीय पुरातत्व विभाग तशेंच सगळ्या यंत्रणांनी कोयर प्रक्रीया प्रकल्पाक मान्यताय दिल्या, अशे मंत्री मोन्सेरात हांणी सांगलें.
सोनसोडो लागसारा बसून जेवण करप शक्य
सोनसोड्यांतल्या कोयरा विशीं कसलीच समस्या ना. सोनसोड्यार आतां कोणेंय जेवण जेवप शक्य आसा. एक मुसूय भोंवचो ना, अशी प्रतिक्रीया मंत्री बाबूश मोन्सेरात हांणी सोनसोडो विशीं उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
