भांगरभूंय | प्रतिनिधी
पेडण्याचो आदलो आमदार आनी उपमुख्यमंत्री बाबू आजगांवकार हांणी आपलें पेडण्यां ‘कमबॅक’ जाहीर केलां. 2027 ची वेंचणूक पेडणेच्यान लडयतलो आसो संकल्प ताणें केला. ताची तयारीय सुरू केल्या अशें म्हूणपाक जाता, कारण पेडणेच्यान अचकीत गायब जाल्लो बाबू आतां पेडण्या दिश्टी पडपाक लागला. आतां लोक म्हणटले दिसल्यार कितें जालें तर? बाबून वेंचणूक लडोवची न्ही? आमी खंय ना म्हणटा… लडोवची. कारण बाबू सांगता की पेडण्यां आपली कर्मभूंय. ताचे खातीर बाबूचे कर्मभुंयेंतलीं कर्मा लोकांनी विसरचीं न्ही इतलेंच. बाबू बरींच वर्सा पेडण्याचो आमदार रावलो त्या वेळार तांणी खूबश्यो बऱ्यो गजाली केल्यो आनी ताची लोकांनी साथ दिली. ते कोणूच नाकारपाक शकना. पूण एका कार्यकाळाक काम केले काय परतून आनी कांयच करपाक नाका अशें जावंक शकना. रस्ते, लायट, नळ, गटारां, राखणे वणटी, हीं सगळीं कामां केलीं. कांय लोक जे बाबूच्या फाटल्यान भोंवताले तांकां सरकारी नोकऱ्योय दिल्यो. हीं बाबूचींच भाशणां आमी तरी कित्याक न्हयकारचीं.
पूण बाबून आनी खूबश्यो गजाली केल्यात. तें आतां पेडणेकरांच्या आंगलट येवपाक लागल्यात. कांय जाण उक्तेपणान उलोवपाकूय लागल्यात. पूण तांकां आतांच्या आमदाराचे समर्थक समजतात. कांय जाण मुखार येवन आलोवपाक सोदिनात. पूण बाबू जाणा आशिल्लो की वेळ येतलो तेन्ना उलयतले, ताका लागून बाबूक 2022 वेंचणुकेक पेडणेच्यान मडगावां पळ काडचो पडलो. हें राजकारण तांणी पक्षाचेर धुकल्लें खरें, पूण आतां पेडण्यां काम कर अशें बाबूक पक्षान सांगलां? आजुनूय कांय जाण म्हण्टले, बाबून अशें कितें वायट केलां तर? कितें केलां तें आमी सांगता, बरें वायट तुमचें तुमी थारावचें!!!
मार्च 2018 पेडण्यां शिगम्याचे कार्यावळीक बाबू भाशण दितालो. दिसूय याद आसा, शुक्रार. बाबून भाशणांत उलयताना म्हणलें, ‘आरे तो मोपा अॅरपोर्ट, आमकां नोकऱ्यो मेळपाक जाय म्हूण आमी हाडलो. आनी आमकांच नोकऱ्यो, धंदे नात? अशें जाल्यार आमकां कित्याक जाय तो अॅरपोर्ट? आमकां अॅरपोर्ट नाका’. लोकांनी खूश जावन ताळयो मारल्यो. ‘चला आतांच या आनी अॅरपोर्ट बंद करया’ सगळे बाबू फाटल्यान नोकऱ्यो आनी धंद्याच्या आशेन धांवले आनी काम बंद केलें. तेन्नाचीं बाबूची उतरां, ‘जो मेरेन पेडणेकारांक नोकऱ्यो मेळनात तो मेरेन अॅरपोर्टाचें काम बंद’. काम बंद केलें आनी सगले घरा गेले. दोन दिसांनी, सोमारा दीस बाबू आयलो आनी आमका अॅरपोर्ट जाय म्हूणपाक लागलो आनी आपूण नाल्ल फोडून काम सुरू केलें. आतां बाबून अॅरपोर्टाचेर कितल्या पेडणेकारांक कामाक लायले काय? आज मरेन ताची जाप बाबून पेडणेकरांक दिल्ली ना. मागीर थोड्या दिसांनी अॅरपोर्ट बंद करपाक आयिल्ले तेच बाबूचेर आरोप करपाक लागले. हातूंतल्यान कोणाक तरी फायदो जालो आनी पेडणेकार शेणले.
ताच्या उपरांत पेडण्यां ‘सरकार तुमच्या दारी’ कार्यावळ आशिल्ली. तेन्ना बाबून राष्ट्रीय महामार्ग करपी कॉन्ट्रेक्टरांक कितें कितें म्हुणिल्लें ते सगल्यांक याद आसतली. मात बाबून ताचे कितें केलें? मागीर बाबू ओगी कित्याक रावलो, थंय लोकांचे इतले जीव गेले, बाबू कित्याक कांय उलयलो ना? हांगां कोणाक फायदो जालो? त्या रस्त्यार आज कितले जीव वचपाक लागल्यात, तेंवूंय लोकांनी पळयलां. आयुष हॉस्पिटलांत तरी कामां मेळटली म्हूण लोक आशेर आशिल्ले. मात थंयसरूय लोकांक चुनो लावन मेकळे. मोपाचेर सगल्या पेडणेकरांक टॅक्सी घेवपांक संद मेळटली अशें बाबूच तेन्ना सांगलें. टॅक्सी कांवटर मेळोवपाक कितें कितें करचें पडटलें तें सगल्यांनी पळयलें. हें सगळें सुरू आशिल्लें तेन्ना बाबू खंय आशिल्लो काय? बाबून एकूय दीस तांच्या आंदोलनाक तेंको कित्याक दिलो ना? आतां बाबू म्हणटलो आपल्या मेरेन कोण पावलोच ना. तशें जाल्यार वेंचणुकेक देंव अशें सांगपाक तुज्या मेरेन कोण पावलो तर? पेडण्याचो इंडोर स्टेडियम, ताचो पेडणेकरांक कितलो लाव जालो तेंवूंय खबर ना. आमी शाळेंत आसतना थंय मॅची जाताल्यो, त्यो आतां खेळपाक मेळनात. बाबूचीं आनीकूय खूबशीं कर्मां आसात. सगळ्यांची वळेरी केल्यार पांच वर्सा बाबूक प्रस्न विचारून सोंपपाचे नात.
बाबून पेडण्यांत येवचो, आमी नाका म्हुणीच ना, पूण फक्त वेंचणुके पुरतोच जाल्यार बाबूची पेडणेकारांक कांयच गरज ना. आतां पेडण्यांत खूबशे विशय आसात. ते घेवन आतांच उलोवपाक लाग. बेश्टे कोणाचे सत्कार केले म्हूण जावपाचें ना. मोपा अॅरपोर्ट, आयुष हॉस्पिटल, राष्ट्रीय महामार्ग, नोकऱ्यो, टॅक्सी, लोकांचे जमनीचे पयशे आजून मेळूंक नात. अशे खूबशे विशय आसात. तुका विसर पडला आसल्यार याद करून दिवपाची तयारीय आसा. आतांच्या आमदारान करून घेवचें अशें सांगून लोकांक पिशांत काडू नाकाय. आतांच्या आमदारानूय काम करपाक जाय, तें ना म्हुणिना. पूण जेन्ना केंद्राचे प्रकल्प येतात तेन्ना पयलींच तांच्या कडेन लेखी कबलात जावपाक जाय आशिल्ली. हें आतां करपाक मोठें आंदोलन उबें करचें पडटलें. पयलीं अॅरपोर्टाचें काम बाबून बंद केलें तेन्ना सोंपें आशिल्लें. पूण बाबूची तशी इत्सा नाशिल्ली आसुयें. कारण ना जाल्यार पेडणेकार ताच्या फाटल्यान भोंवचे नाशिल्ले. बाबू पेडण्यां वेंचणुकेक रावतलो जाल्यार बाबून जाहीर चर्चा दवरची. आपल्या बऱ्या वायट कामांचो लोकांक उगडास करून दिवचो. आतांचो आमदार कमी पडटा जाल्यार तेंवूंय दाखोवन दिवंचें. आपलो स्वार्थ सादलो म्हूण जायना. बाबून हो कमबॅक खेळ बंद करचो. आपली ‘अधुरी कहानी’ म्हळ्ळ्यार कितें काम उरलां तें सांगचें. बाबूय सरकार पक्षाचो घटक. आतां आमदाराचेर टिका नाका, तेका मतां मारात म्हूण सांगपी बाबूचो व्हिडियो आजून आसा. तेन्ना बाबूक कळूंक नासलें काय? काय मुद्दाम लोकांक फोंडांत घातले? बाबूक पेडणेकार रावल्यात. बेश्टे ल्हान ल्हान कार्यावळी करून बाबून पळ काडचो न्ही. लोकां मेरेन आतांच वचपाक सुरवात करची. पळोवया तरी बाबूचो कमबॅक फाॅर्म्युला कितें तो!
ज्ञानेश्वर वरक
9403541232
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
