बाबांची शिकवण

भांगरभूंय | प्रतिनिधी

दोतोर मेडिकलांत मानधन घेनात. हांवें तांकां अजापान अशें कित्याक, अशे विचारलें तेन्ना तांणी ही जाप दिली. वांगडाच ही गजाल वाऱ्यार घालिनासप अशी विनवणी केली.

अणभव

ती बाबांची शिकवण आशिल्ली. तांणी म्हाका सांगिल्लें, शिकून जाले उपरांत जर मॅडिकलाक पावलों जाल्यार पगार घेनासप,  सेवा दिवप. दोनूय हात जोडीत, हात क्राॅस करून, कानांक लायत, दोळे धांपीत दोतोरोन म्हाका जाप दिली. हांव पळयत आनी आयकत उरलें. फुडलो प्रस्न विचारपाक म्हाका मातसो वेळ लागलो. म्हजे सामकार आशिल्ले डाॅ. मधुमोहन प्रभुदेसाय. गोंय वैजकी म्हाविद्यालयाच्या युरोलाॅजी विभागाचे प्राध्यापक आनी मुखेली. किडनी ट्रांसप्लाण्ट हो तांचो हातखंडो. अवयव दान मळा वयलें ताचें कार्य तोखणाय करपा सारकें, अपरूप.

आकाशवाणीच्या म्हादय वाहिनी वयल्यान तशेंच एफएम रेन्बो सेवेंत दर बुधवारा अस्तुरी कार्यावळींत हांव लायव्ह सादर करतां. हे फावटीं बुधवारा अंगदान जिवन संजिवनी अभियाना खाला हांव डाॅ. प्रभुदेसाय हांची मुलाखत घेतालें. ताचीच ही पूर्वतयारी आशिल्ली. तांचे विशीं वाचतना म्हाका मेळिल्ली ही माहिती. दोतोर मॅडिकलांत मानधन घेनात. हांवें तांकां अजापान अशें कित्याक, अशे विचारलें तेन्ना तांणी ही जाप दिली. वांगडाच ही गजाल वाऱ्यार घालिनासप अशी विनवणी केली. बाबान सांगलें आनी हांवें आयकलें. सहजपणान तांणी दिल्ली जाप आनी ती दितना तांच्या तोंडा वयलें समाधान.

आपणें कितेंय केलें जाल्यार ताची जायरात करून आपल्याकूच व्हडपण घेवपाच्या आयच्या काळांत दोतोरांचें हें वागणें म्हाका एक वेगळोच अणभव दिवन गेलें. 

एक व्हडलो दोतोर, ताचो विशय तसो गंभिरूच. मॅडिकल कॉलेजींतलें तांचें व्यस्त कामकाज. तांची अपोयण्टमॅण्ट मेळपाक म्हाका तीन सप्तकां लागलीं. आयकुप्यांचे प्रस्न आयिल्ले, तरीय मनार एक दडपण कशें आशिल्लें. दोतोर कसो आसतलो काय? म्हज्या, आयकुप्यांच्या प्रस्नांक तांणी दिल्ल्यो जापो आमकां कळटल्यो काय? अशे अनेक प्रस्न मनांत एकठांय जाल्ले. हरशीं सगल्यां कडेन सहजपणान संवाद सादपी हांव दोतोरा विशीं विचार करीत आशिल्लें. दोतोर वेळार स्टुडियोंत पावतलो व्हय, होय एक प्रस्न आशिल्लो. दोतोर वेळा बाबतींत सामको रेक्त. तांच्या कार्यालयांत मेळिल्ली ही जाप खरी थारली. दोतोर वेळार स्टुडियोंत भितर सरले. हांसत्या मुखान. हावें नमस्कार करीत तांकां येवकार दिलो. पूर्वतयारी करतना तांचें सहजपणान, साद्या उतरांनी जापो दिवप म्हाका एक वेगळोच आत्मविस्वास दिवन गेलें.

मुलाखत सोंपले उपरांत म्हाका रोखडोच फोन आयलो. ‘गाॅड ब्लॅस यू चारुशीला. आनी दोतोर,  तुमची मुलाखत खूब बरी आशिल्ली. आमकां खूब माहिती मेळ्ळी. ‘हांव धर्मा चोडणकार उलयतां. तुमकां देव बरें करूं!’

आकाशवाणी वेल्यान अस्तुरी कार्यावळींत वेगळ्या वेगळ्या मळां वयल्या नामनेच्या व्यक्तींच्यो मुलाखती हांव घेतां. आयकुपी लायव्ह प्रस्न विचारतात. तज्ञांच्यो जापो आयकप हो एक वेगळोच अणभव आसता. खूब कितें शिकूंक मेळटा. डाॅ. मधुमोहन प्रभुदेसाय हांची मुलाखत म्हाका खूब कितें शिकोवन गेली. तांच्या बाबांची शिकवण मनांत घर करून रावली. 

दोतोरा सांगातान फोटो काडून हांवें स्टेटस घालो – विद्या विनयेन शोभते.

– चारुशीला दत्तराज देसाय

94211 50739