भांगरभूंय | प्रतिनिधी
बाबली नायक हें निखटें एके व्यक्तीचें नांव नाशिल्लें. खंयच्याय सिद्ध कर्मयोग्याक वापरपाचें तें एक विशेशण आशिल्लें. निश्ठा आनी सादेपणाचें तें एक प्रतीक आशिल्लें. तांच्या नांवांतच बाब हें उतर आशिल्लें. बाब ह्या उतराक शणै गोंयबाबांनी एक खाशेलो अर्थ दिलो. कोंकणी चळवळींत स्वाभिमानाक समानार्थी उतर तें! आमचे पिळगेन शणै गोंयबाबाक पळयलो ना. पूण शणै गोंयबाबांचे साबार अवतार आमी लागींच्यान पळयले आनी अणभवले. तांच्या वांगडा आमी वावुरले. बाबलीबाब तातूंतलोच एक आशिल्लो!
कोंकणी चळवळ निधर्मी. समानतेच्या मार्गान वचपी. बाबलीबाब तरणेपणाच्या हुमऱ्यार आसतना संघाच्या शाखेर वचपी. स्वयंसेवक! आणिबाणीच्या काळांत बंदखण भोगिल्लो हो निर्भीड झुजारी. तशें जाल्यार तो कोंकणीच्या सर्व-धर्म-समभावी चळवळींत कसो पावलो? कसो एकरूप जालो? कसो विरघळ्ळो? ताचें कारण जिविताच्या मार्गार बरें तें खरें म्हूण मानून एका ध्येयान आनी ध्यासान मुखार वचप हो ताचो सभावगूण आशिल्लो. तोच ताचो धर्म आशिल्लो!
सुनापरान्त दिसाळ्यांत उपसंपादक म्हूण वावुरतना तांणी कितल्याश्याच जाणांक बरोवपाची दिक्षा दिली. तरणाट्या विचारांक माची मेळची म्हूण तांच्यांत आत्मविस्वास तयार करून तांकां बरोवंक प्रोत्साहीत केलें. विचारांच्या भोवआंगी आनी भोवढंगी प्रवाहांक ताणी सुनापरान्त दिसाळ्यांतल्यान मुक्त व्हांवपाक वाट दिली. आयताराचे पुरवणेक तांणी एक वेगळें मुखामळ दिलें. तातूंत लालित्य, प्रगत विचारधारा, सर्जनशिलताय, विज्ञान- तंत्रज्ञानांतले नवे प्रयोग आनी शोध, सैम-पर्यावरणाची वळख, भाशा शास्त्र आनी अलंकार अश्या जिवनसत्वांचो तांणी सुंदर गोफ विणलो. तांकां केन्नाच कसले वाद लागले नात. ना म्हणल्यार कोंकणी- मराठीच्या वादांत तांणी केन्नाच कसली तडजोड केली ना. ताठ मानेन आनी कणखर कण्यान जिणेच्या निमाण्या खिणा मेरेन कोंकणीच्या वृद्धी खातीर चळवळीच्या होमखणांत जमता तश्यो आनी जमता तितल्यो समिधा तो घालत रावलो.
एक निश्कलंक, निसुवार्थी, निश्ठावान, सतत कार्यमग्न, स्फूर्तवंत वावुरपी तो. कोंकणी चळवळींतली एक सतत कार्यरत संस्था ती. आंगा वेल्या शुभ्र धव्या शर्टा इतलोच आंगां भितरलो शुभ्र धवल सभाव आनी चारित्र्य. जितलो हांसतो, प्रसन्न भायल्यान तितलोच मनभुलोवणो भितरल्यान. जसो बाह्यरंगी तस्सो अंतर्रंगी. पारदर्शक! मेजकेंच पूण मनाक भुलोवपी आनी फुलोवपी ताचें उलोवप. ताच्या जिवितांत सदांच इश्टांचो समूह वाडत गेला. केन्नाच तो उणो जालो ना. मनीस जोडपाचो ताचो सभाव, तोडपाचो न्हय!
कोंकणी राजभास चळवळीच्या निर्णायक आंदोलनाची बुन्याद घालपी बाबलीबाब. ताणें त्या दिसा एक ल्हानशीच कीट पेटयली. सुक्या करडाक पेट घेवचो तशी ती कीट उज्याचें रूप घेवन गोंयभर फासपली. तीच कोंकणी प्रजेचो आवाज जाली. पांचशें पंच्चावन्न दिसांच्या आंदोलना उपरांत विधानसभेंत राजभास कायदो पारीत जालो तेन्नाच ती ध्येयपुर्तीन थांबली. बाबलीबाबान स्वता केन्ना ह्या गजालीचें स्रय घेतलें ना. ताका मोन्यानी काम करपाक आवडटालें. प्रसिद्धी आनी मान-सन्मान हांचे पसून तो स्वताक पयस दवरतालो. कोंकणी भाशा मंडळान दोनदां ताका सेवा पुरस्कार भेटोवपा खातीर वेंचून काडलो. ज्या संस्थेच्या घडपांत आपलें योगदान आसा आनी चळवळींतली जेश्ठ संस्था आसा तिचो सेवे खातीरचो जिणे गौरव पुरस्कार मेळप हाचे परस आपल्या कामाचें आपणेंच आत्मसमाधान मेळोवन तोच पुरस्कार मानप हें बाबलीबाबाक चड मोलाचें दिसतालें.
बाबलीबाबाचें घर म्हणल्यार कोंकणीची आदर्श मठी कशी. चवथीक कोंकणी भाशेंत आरती, लग्नाक कोंकणी भाशेंत मंगलाश्टकां आसूं येतात अशी कल्पना लेगीत कोण करपाक धजचो नाशिल्लो तेन्ना ते स्वर आमकां बाबलीबाबाच्या घरांत आयकूंक मेळटाले. हें घडटालें ताचो मुखेल निर्मितीस्त्रोत आनी प्रेरणास्त्रोत बाबलीबाबच आसतालो.
बाबलीबाब जंय वतालो थंय वावुरप्याचीं बिंयां शिंपडायत वतालो. तातूंतलीं कांय बिंयां वादळ- वाऱ्यांत हुडून वतलीं आनी पावसा उदकांत व्हांवन वतलीं जाल्यार कांय आशिल्ले कडेनच वतांत सुकून वतलीं हें ताका खबर आशिल्लें. पूण कांय बिंयां ह्या मातये कडेन घट्ट नातें जोडटलीं आनी ह्या मातयेंत कर्तुबाचीं फुलां फुलयतलीं म्हणपाचो तांकां खर विस्वास आसतालो. तांच्याच प्रेरणेन आपूण कोंकणी चळवळींत भितर सरलों, बरोवंक लागलों, वावरूंक लागलों म्हूण अभिमानान सांगपी हजारांनी वावुरपी आमकां आयज गोंयभर मेळटले. कोंकणी भाशा मंडळाच्या वावरांतलें तांचें योगदान अशेंच प्रशासकी आनी लोहचुंबकी!
बाबली नायक सवंसाराक अंतरलो हीं उतरां सकाळींच मोबायलाचेर झळकलीं. मनीस मरतगीच तो भायर पडलो, सोंपलो, अंतरलो अशीं उतरां आमी वापरतात. सगल्यांकच तीं लागू पडटात काय? बाबलीबाबाक तीं लागू पडटलीं काय? कोंकणी चळवळीच्या संघर्शपर्वाचो इतिहास जेन्ना जेन्ना बरोवप जातलो तेन्ना तेन्ना बाबली नायक नांवाच्या निश्ठापर्वाचो उल्लेख जायत उरतलोच न्हय? तशेंच जातलें आनी बाबली नायक हें नांव कोंकणी मातयेंत एकरूप जावन अज्रंवर जातलें.
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
