भांगरभूंय | प्रतिनिधी
खबरां संस्था
इस्लामाबादः पाकिस्तानाच्या 75व्या स्वातंत्र्य दिसा निमतान पाकिस्तान क्रिकेट पंगडाचो कॅप्ठन बाबर आझमाक सितारा-ए- इम्तियाज ह्या पुरस्कारान भोवमानीत केलां. राष्ट्रकुल खेळां सर्तींत भालाफेक 90 मीटरां परस चड मोखून मारून भांगरा पदक मेळोवपी अर्शद नदीमाक तशेंच वेटलिफ्टर नोहा बट हांका प्रायड ऑफ परफॉर्मन्स पुरस्कार भेटयल्यात.
पाकिस्तानाच्या बायल पंगडाची कॅप्टन बिस्माह महरूफ हिकाय सितारा-ए- इम्तियाज ही पदवी दिल्या. 23 मार्च 2023 दिसा हे पुरस्कार भेटयतले. सितारा-ए- इम्तियाज हो पाकिस्तानाचो तिसरो सगल्यांत व्हडलो नागरी पुरस्कार आसा. देशाची सुरक्षा, संवसारीक शांतताय, देशाची संस्कृती वाडोवपा वांगडाच भौशीक जिणेत बरें काम केल्ल्याक तो दितात.
बाबरच्या फुडारपणा खाला पाकिस्तान पंगडाचो आशिया कप सर्तींतलो पयली मॅच रोहीत शर्माच्या भारतीय पंगडा कडेन जातली. 28 ऑगस्टाक दोनूय पंगड आमने-सामने येतले. पोरूं 24 ऑक्टोबराक जाल्ले टी-20 वर्ल्ड कप सर्तींत पाकिस्तानान भारताक 10 विकेटींनी हारयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
