भांगरभूंय | प्रतिनिधी
विद्यापीठाच्या कुलगुरुंचेर गोवा फाॅरवर्डाचो आरोप
पणजीः गोंय विद्यापीठांत शिकोवपी प्राध्यापकांची शिक्षणीक पात्रताय चड नाशिल्ल्यान गोंय विद्यापीठाचो दर्जो देंवता अशें विधान करपी गोंय विद्यापीठाचे कुलगूरू हरीलाल मेनन हांचो आमी निशेध करतात. आपलें अपेस लिपोवन दवरपा खातीर कुलगुरू गोंयच्या प्राध्यापकांक दोश दित सुटला. फक्त भायल्या राज्यांतल्या प्राध्यापकांक विद्यापीठांत भरून तांकां येणावळीचें साधन दिवपाचेर कुलगुरून लक्ष केंद्रीत केलां, असो आरोप गोवा फॉरर्वडान केला.
कुलगुरू हरिलाल मेनन हांणी एका ‘दिसाळ्या’क मुलाखत दितना गोंयच्या चडश्या प्राध्यापकांची शिक्षणीक पात्रताय उणी आशिल्ल्यान तांकां घेतल्यार विद्यापीठाचो दर्जो देंवत आयला अशें म्हणलां असो दावो गोवा फॉरर्वडचे फुडारी दिलीप प्रभुदेसाय आनी प्रशांत नायक हांणी पणजे घेतिल्ले पत्रकार परिशदेंत केलो.
गोंयच्या प्राध्यापकां कडेन शिक्षणीक पात्रताय उणी आसा हो कुलगुरून केल्लो दावो फटीचो अशें सांगून प्रभुदेसाय हांणी कांय गोंयकार प्राध्यापकांची नांवां घेवन तांचे कितलेशेच दर्जेदार शोध प्रबंध नियतकालिकेंत उजवाडाक आयल्यात अशें म्हणलें.
जाल्यार गोंय विद्यापीठांत भायल्या राज्यांतले चार प्राध्यापक आसात तांचीं शोध प्रबंधां नात. देखून शोध प्रंबध उजवाडाक हाडपात गोंयकार खंय पात्रतायेंत उणे पडटात? हें मेनन हांणी सिध्द करचें. भायल्या लोकांक विद्यापीठांत भरून तांकां येणावळीचें साधन तयार करून दिवप हेंच मेनन हांचे कारर्किदींत जालां आनी विद्यापीठाचें रँकींग उणें जावपांत मेनन हे स्वता कारणीभूत आसात, असो आरोप प्रभुदेसाय हांणी केलो.
नॅकाचो पंगड तीन दिसां खातीर गोंयां येवपाचो आसा. विद्यापीठाचो दर्जो आनीक सकयल देंवतलो म्हण मेनन हांकां जाणीविकाय आसा. देखून ह्या भंयान गोंयकार प्राध्यपकांक लागून दर्जो सकयल देवता अशी हवा मेनन हांणी तयार केला. गोंय विद्यापीठाचे शिक्षणीक अवतिकायेक मेनन हे स्वता जापसालदार आसात, असोय आरोप प्रभुदेसाय हांणी केलो.
गोंय विद्यापीठांत भायल्या प्राध्यापकांक नोकरी दिवचे विशीं आमी विधानसभेंत आनी भायर बोवाळ केल्लो. मात हो बोवाळ केले उपरांत भाजपाचें सरकार खंयतरी दखल घेतलें अशें आमकां दिशिल्लें. मात सरकारान मेनन हांकां विद्यापीठ आपले मर्जीन चलोवपा खातीर रान मेकळें करून दिलें, असो आरोप प्रशांत नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
