भांगरभूंय | प्रतिनिधी
पणजी : हवामान खात्यान गोंयांत 25 ते 27 ऑगस्ट ह्या काळांत मध्यम स्वरुपाच्या पावसाची शक्यताय उक्तायल्या. ते प्रमाण ह्या दिसां खातीर पावसाचो यलो अलर्ट जारी केला. 27 तारखेक चवथ आनी त्याच दिसा पावसाची हाजेरी लागपाची शक्यताय आसा. खात्यान 22 ते 24 ऑगस्ट ह्या दिसांनी तुरळक स्वरुपाच्या पावसाची शक्यताय उक्तायल्या.
गोंयांत हंगामी पावस शेंकड्याच्या हुमऱ्यार पावला. गोंयांत 1 जून ते 21 ऑगस्ट ह्या काळांत सरासरी 98.26 इंच पावसाची नोंद जाल्या. अंदूं पावसाचें प्रमाण 1 टक्क्यान उणें आसा. बिरेस्तारा गोंयांत किरकोळ स्वरुपाच्या पावसाची नोंद जाल्या. अदीं मदीं पावसाच्या दडकांची नोंद जाली. दमट वातावरण आसलें तरीय सकाळीं कांय वेळ कडकडीत वत पडिल्लें. गोंयांत 24 वरांत सरासरी 0.93 इंच पावसाची नोंद जाली.
हे मजगतीं, वाळपय 1.66 इंच, काणकोणां 1.2 इंच, सांग्यार 1.27 इंच जाल्यार केप्यां 1.18 इंच पावसाची नोंद जाली. पावस नाशिल्ल्यान बिरेस्तारा गोंयांत चडांत चड तापमान वाडलें. पणजे चडांत चड 30.6 अंश जाल्यार उण्यांत उणें 24 अंश सेल्सियस तापमानाची नोंद जाली. मुरगांवां चडांत चड 27 अंश जाल्यार उण्यांत उणें तापमान 24 अंश सेल्सियस आसलें. फुडले 6 दीस गोंयांत चडांत चड 29 ते 30 जाल्यार उण्यांत उणें 24 अंश सेल्सियस आसपाची शक्यताय आसा.
16 तल्या 6 केंद्रांनी शेंकडो
गोंयांत 1 जून ते 21 ऑगस्ट ह्या काळांत 14 तल्या 6 केंद्रांनी पावसाचो शेंकडो पुराय जाला. धारबांदोड्यां 130.07 इंच, सांग्यार 127.83 इंच, वाळपय 128.70 इंच, केप्यां 119.97 इंच, फोंड्यां 104.45 इंच जाल्यार सांखळे 100 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
