भांगरभूंय | प्रतिनिधी
फोंडें: केळींनी- उसगांवां रंग कामा खातीर दवरिल्ल्या वाहनांच्या कामाचे पांचशे रुपया उणे दिल्ल्यान मॅकेनीक अशोककुमार बाबाजी सेटी (५५, सध्या उसगांव, मूळ ओरिसा) आनी किशन सनगांवकार (५३, तिस्क उसगाव) हांचे मदीं आयतारा सांजेवेळार वाद निर्माण जालो. आपल्या बापाय कडेन वाद केल्ल्यान तिडकल्ल्या कुणालान (२५) मॅकेनिकाचे तकलेर लोखणाच्या रोडान हल्लो केलो. ह्या हल्ल्यात जखमी जाल्ल्या मॅकेनिकाचेर सध्या गोमेकॉंत उपचार सुरू आसात. तो गंभीर आशिल्ल्याचें कळटा. फोंडे पुलिसांनी बापूय आनी पुताक अटक केल्या.
पुलिसांनी दिल्ले म्हायती प्रमाण, किशनान कांय दिसां पयलीं मडगांवां गॅरेजींत एक टॅम्पो रंगोवपाक दवरिल्लो. तेन्ना ५ हजार रुपयांत काम करपाचें थारिल्लें. मात आयतारा सांजेवेळार किशनान रंगकामाचे फकत साडेचार हजार रुपया दिल्ल्यान त्या दोगांय मदीं वाद जालो. मॅकानिकान आनीक पांचशें रुपया मागले. मात किशनान दिवंचो ना अशें सांगलें. त्याच वेळार तिस्क -उसगांवां गेल्ल्या कुणाल सनगांवकार हाणें आपल्या बापायक फोन केलो. ह्या वेळार मॅकानीक पांचशें रुपयां खातीर वाद करता अशें बापायन पुताक सांगलें. तिडकल्लो कुणाल रोखडोच गॅरेजींत आयलो आनी गॅरेजींत आशिल्ल्या लोखणाच्या रॉडांत कुणालान मॅकानिकाचे तकलेर वार केलो. गंभीर जखमी जाल्ल्या मॅकानिकाक रोखडोच १०८ ऍम्बुलन्सींत पिळयेंच्या मुळाव्या भलायकी केंद्रांत व्हेलो. उपरांत ताची भलायकी आनीक इबाडिल्ल्यान दोतोरांनी ताका गोमेकॉंत धाडलो.
हे घडणुकेची म्हायती मेळटांचे फोंडें पुलीस स्टेशनाचे निरीक्षक विजयनाथ कवळेंकार हे घडणुके सुवातेर पावले. उपरांत घडणुकेचो पंचनामो केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
