भांगरभूंय | प्रतिनिधी
उडुपी, खबरां संस्था: कर्नाटकांतल्या उडुपींत एक विचित्र घडणूक घडल्या. हांगा एके बायलेन आपल्या घोवा आड पुलिशेंत कागाळ केल्या. आपलेच धुवेचे खाजगी व्हिडीओ घोवान व्हायरल केल्ल्याचो आरोप ते बायलेन केला. पिडेस्त तरणाटी १८ वर्सां पिरायेची आशिल्ल्यान १३ जुलयाक पुलिसां कडेन घोवा आड लेखी कागाळ केल्ल्याची म्हायती मुखार आयली. उपरांत हे तरणाटेन फिनायल पियेवन आत्त्महत्त्या करपाचो यत्न केलो. मात वेळार उपचार केल्ल्यान ती वाटावली.
नेमकें कितें प्रकरण?
तरणाटे चलयेन फिनेल पियेल्ल्याचें कळटांच तिका उडुपींतल्या सरकारी हॉस्पिटलांत दाखल केल्ली. आतां ते बरें आसा. हे तरणाटेचे आवयन दाखल केल्ले कागाळेंत म्हणलां की, आरोपीक ताचे धुवेचे प्रेमसंबंध मान्य नाशिल्ले. हे तरणाटेचे तांच्याच नात्यांतल्या एका तरणाट्या वांगडा प्रेमसंबंध आसात. आरोपीन चलयेच्या इश्टाक घरा आपयलो. उपरांत ते तरणाटेक आनी तरणाट्याकूय बडयलो. चलयेच्या इश्टा कडल्यान आरोपीन चलयेन धाडिल्ले खाजगी व्हिडिओ आनी फोटो डावनलोड करून स्वता कडेन घेतले.
व्हायरल केले व्हिडीओ
धुवेन केल्लो हो प्रकार आवडूंक नाशिल्ल्यान तिका धडो शिकोवपाच्या हेतान ह्या बापायन आपलेच धुवेचे फोटो आनी व्हिडीओ आपल्या अकावंटावेल्यान सोशल मिडियाचेर पोस्ट केले. तशेंच ते चडांत चड लोकां मेरेन पावपा खातीर फॉरवर्डूय केले. उपरांत आपल्या घोवान आपल्याक आनी आपले धुवेक मार घालो. आमी दोगांय जखमी जाल्यांत, अशें बायलेन कागाळेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
