भांगरभूंय | प्रतिनिधी
हैदराबाद, खबरां संस्था ः मनशाच्या मरणा उपरांत ताच्या खाजगी मालमत्तेचेर वाद जावपाचीं लाखांनी प्रकरणां न्यायालयांत प्रलंबीत आसात. अशा प्रकरणांत मालमत्तेचो दावो करपी जायते प्रतिवादीय आसात. अशाच एका प्रकरणांत तेलंगणा उच्च न्यायालयान म्हत्वाचो निकाल दिला. बापायच्या मरणा उपरांत ताणें स्वता मेळयल्ले संपत्तीचेर वा मालमत्तेचेर धुवांचो हक्क आशिल्ल्या संबंदी न्यायालयान हो निकाल दिला आनी त्या वेळार न्यायालयान बापायच्या कथित मृत्यूपत्राचोय उल्लेख केला.
नेमके प्रकरण कितें?
बापायचे मालमत्तेचेर भयणीन केल्ल्या दाव्या आड एका भावान तेलंगणा उच्च न्यायालयांत याचिका दाखल केल्ली. न्यायाधीश एम. जी. प्रियदर्शनी हांचे मुखार ही सुनावणी जाली. लायव्ह लॉच्या खबरां प्रमाण ही याचिका दाखल करतना भावान आपल्या मेल्ल्या बापायच्या मृत्यूपत्राचो उल्लेख केलो. भयणीक मालमत्तेचेर कसलोच हक्क ना असो उल्लेख मृत्यूपत्रात आयला असो दावो भावान केलो. हे खातीर भयणीची अर्थीक स्थिती बरी आसा अशें कारण दिवन भावान युक्तिवाद केलो.
न्यायालयान मृत्यूपत्र न्हयकारलें…
मजगतीं, न्यायालयान आपल्या निकालांत मेल्ल्या बापायचे मृत्यूपत्र आनी तातूंतलो मुद्दो काडून उडयलो. फकत भयणीची अर्थीक स्थिती बरी आसा म्हणून बापायन स्वता मेळयल्ल्या मालमत्तेंत तिचो हक्क ना म्हणूंक फावना अशें न्यायालयान नमूद केले. याचिकादार भावान दावो केल्ल्या प्रमाण बापायचे मृत्यूपत्र खरे मानले तरी तातूंतल्या मुद्या प्रमाण भयणीचो मालमत्तेचेर हक्क ना म्हणूंक मेळना अशेंय न्यायालयान आपल्या निकालांत सांगलां.
हुंडो म्हणून दिल्ले रक्कमेचें कितें?
ह्या वेळार याचिकादार भावान लग्नाच्या वेळार भयणीक दिल्लो हुंडो हो मालमत्तेंतलो तिचो वाटो असो युक्तिवाद केलो. पूण न्यायालयान होय दावो न्हयकारलो. भयणीच्या लग्नांत नेमको हुंडो कितलो दिल्लो हें संबंदीं खंयचोच पुरावो न्यायालयांक मेळ्ळो ना. तशेंच, जरी कांय रक्कम वा हेर मालमत्ता हुंडो म्हणून भयणीक दिल्या तरी, तें लेगीत बापायच्या स्वता मेळयल्ल्या मालमत्तेचेर भयणीचो हक्क ना अशें म्हणूंक शकना अशेंय न्यायालयान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
