भांगरभूंय | प्रतिनिधी
भांगरभूंय । प्रतिनिधी
म्हापशेंः बंदिरवाडो शापोरा आनी बादें हांगा फाटल्या एक म्हयन्या सावन उदका पुरवणेची समस्या तयार जाल्या. ताका लागून तिडकल्ल्या थळाव्या लोकांनी म्हापशें हांगा उदका पुरवण विभागाच्या कार्यालयांत येवंन अधिकाऱ्यांक घेराव घालून जाब विचारली. आमकां उदक मेळना तेन्ना कार्यालयांत आयल्या उपरांत कांय दिसां खातीर उदका पुरवण सारकी जाता, उपरांत परिस्थिती पयल्या भशेन जाता अशें लोकांनी अधिकाऱ्यांक सांगून तांकां धारेर धरलें.
उदका पुरवणेची ही समस्या फाटल्या जाय त्या वर्सां पसून सुरू आसा. बांदकाम खाते कसलीच उपाय येवजण करना असो आरोप ग्रामस्थांनी केलो. उदका पुरवण विभागाचे सुपरवायजर आनी पंप ऑपरेटर उदक हेरकडेन घुंवडायतात. ताका लागून आमकां उदक मेळना. उदक टॅन्कर लेगीत वेळार येनात, खाजगी टॅन्करा उदक हाडपाचो यत्न केल्यार थळावे लोक प्रतिनिधी तातूंत आडमेळे हाडटात असो आरोप पार्वती नागवेकार हिणे केलो.
उदक कित्याक मेळना अशें विचारल्यार पायपलायनीक गळटी लागल्या अशें सांगतात, उदका पुरवण सारकी करपा कडेन कोणूच लक्ष दिना अशे नीलेश गोवेकारान सांगलें. फाटल्या जायत्या वर्सा सावन आमी उदका समस्येक तोंड दितात अशें ज्ञानेश्वर पेडणेकारान सांगलें. मजगतीं फुडल्या कांय दिसांत सारकी उदका पुरवण करपाचें उतर सहाय्यक अभियंतो रणधीर अस्टेकार हाणे लोकांक दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
