बादें, आसगांवां रॉटविलर सुण्याच्या हल्ल्यांत एकलो जखमी

भांगरभूंय | प्रतिनिधी

म्हापशें, प्रतिनिधी ः बादें, आसगांवां रॉटविलर सुण्याच्या हल्ल्यांत विनिल साळगांवकार हो तरणाटो जखमी जालो. ह्या प्रकरणांत ताच्या भावान सुण्याच्या धनया आड पुलिशेंत कागाळ केल्या. सुण्याक ताब्यात दवरपा खातीर धनयान कसलेच उपाय करूंक नाशिल्ल्याचो आरोप कागाळींत केला. हें विशीं आजून गुन्यांव नोंद जावंक ना.
मेळिल्ले म्हायती प्रमाण, काल बुधवारा, 29 जानेवारीक रातच्या 10.15 वरांचेर ही घडणूक घडली. एका घरांतलो सुणो विनिलाक चाबलो. हाचे उपरांत रोखडोच विनिलाक शिवोलेंतल्या भलायकी केंद्रांत व्हरून तांचेर उपचार केले. मजगतीं, सुण्यान हाचे आदीं विनिलाचे भयणीचेरुय हल्लो केल्लो. त्या वेळार शेजारपणाक लागून सुण्याच्या धनयाचेर कागाळ करुंक नासली. पूण कालचे घडणुके उपरांत कागाळ करचीच पडली अशें विनिलाच्या भावान सांगलें.

मजगतीं, सुण्याची रॉटविलर जात ताच्या हिंसक सभावा खातीर वळखतात. 29 ऑगस्ट 2024 दिसा हणजुण्यां जाल्ले घडणुकेंत ल्हान भुरग्याक मरण आयिल्ल्यान अशा सुण्यांच्या जातींचेर प्रस्न निर्माण जाल्ले. हाचे उपरांत सरकारान रॉटविलर आनी अशा हेर हिंसक जातीच्या दुश्ट सुण्यांचेर बंदी घाली. पशु संवर्धन खात्यानय हे संबंदी जायते नेम जारी केल्ले.
पशु संवर्धन खात्यान जारी केल्ले अधिसुचोवणेंत सांगिल्लें, सुण्याचें नांव, जल्म, जात, लिंग आनी हेर म्हायती सुण्याच्या धनयाक दिवची पडटली. तशेंच एक मनीस सुणो दवरता आनी त्या सुण्यान हेर लोकांक वा जनावरांक धोको निर्माण केल्यार ताचे खातीर ताचो धनी पुरायपणान जापसालदार आसतलो अशें प्रतिज्ञा पत्र पशु संवर्धन खात्याक दिवचें पडटले अशें अधीसुवणेंत नमूद केल्ले. तशेंच धनयान दुर्लक्ष केल्यार भारतीय दंड संहिता 2023 प्रमाण ताचेर कायदेशीर कारवाय जातली अशें सांगिल्लें.
सुण्यांच्या हल्ल्याक लागून मनशांक मरण येवपाच्यो घडणुको वाडत आशिल्ल्यान केंद्र सरकारान राज्यांक ह्या 23 जातींच्या सुण्यांची आयात तशेंच तांचे विक्रीचेर बंदी घालची अशें सांगिल्लें. हे वळेरेंत रॉटविलर आनी पिटबुल हांचोय आस्पाव आसा.