भांगरभूंय | प्रतिनिधी
-दुबावीत ज्योकीम डिसिल्वा हाका अटक, दोन दीस पुलीस कोठडीमडगांवः बाणावले डॉ. राफेल अझिलो हांच्या वृद्धाश्रमांत रावपी बायल गिल्हेर्मिना डिकॉस्टा हिच्या बँक खात्यांतले 9.26 लाख रुपया आनी 200 ग्रॅम भांगराच्याे वस्ती हाचो समिती वांगडी ज्योकीम डिसिल्वा हांणी स्वताच्या वैयक्तीक फायद्या खातीर वापर केल्ल्यान कोलवें पुलिसां कडल्यान दुबाविताक अटक केल्या. हे विशीं गिल्हेर्मिना डिकॉस्टा हांणी कोलवे पुलिशेंत कागाळ दाखल केल्ली. ताचे आदरार कालवे पुलिसांनी गुन्यांव दाखल करून दुबावीत ज्योकीम डिसिल्वा हाका अटक केल्या. पुलिसांनी ताका न्यायालयान हजर केलो तेन्ना न्यायालयान दोन दीस पुलीस कोठडेंत दवरपाचो आदेश दिला.
पुलिसांनी दिल्ले म्हायती प्रमाण, गिल्हेर्मिना डिकॉस्टा हांणी हे विशीं कोलवे पुलिशेंत कागाळ नोंद केल्या. डिकॉस्टा ह्यो 1 डिसेंबर 2016 ते 9 जुलय 2024 ह्या काळांत बाणावलेंतल्या डॉ. राफेल अझिलो वृद्धाश्रमांत आशिल्ल्यो. त्या वेळार तांणी विस्वासान समिती वांगडी ज्योकीम मॅन्यूअल डिसिल्वा हांच्या ताब्यांत बँकेचें एटीएम आना बँक धनादेश दिल्ले. ज्योकीम हांणी तांच्या बँक खात्यांतल्यान 9 लाख 26 हजार 948 रुपया काडून ताचो वैयक्तीक कारणां खातीर वापर केलो. ते भायर डिसिल्वा हिका मानसीक त्रास दिवन तिचे कडले 200 ग्रॅम भांगराचें वस्ती घेतले. ताचो तांणी वैयक्तीक फायद्या खातीर वापर केलो.
हे विशीं कागाळ दाखल जाले उपरांत कोलवे पुलिसांनी दुबावीत ज्योकीम डिसिल्वा हाका अटक केल्या. दुबाविताक न्यायालयांत हजर केलो तेन्ना न्यायालयान ताका दोन दीस पुलीस कोठडेंत दवरपाचो आदेश दिला.
ह्या प्रकरणांत कोलवे पुलिस निरिक्षक रितेश तारी हांच्या मार्गदर्शना खाला पुलीस उपनिरिक्षल प्रशांत भगत तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
