भांगरभूंय | प्रतिनिधी
1 ऑगस्टा उपरांत बोटी घालतले दर्यांत
भांगरभूंय । प्रतिनिधी
मडगांवः बाणावले दर्यादेगेर परंपरीक नुस्तेकारांनी प्रार्थना केले उपरांत बोट दर्यांत घालून रांपण मारून नव्या हंगामाक सुरवात केली. सध्या नुस्तेमारीक बंदी आसा. 1 ऑगस्टाक बंदी काडले उपरांत हवामानाचो अदमास घेतले. उपरांत नुस्तेमारी खातीर बोटी दर्यांत घालतले, अशें परंपरीक नुस्तेमार्यांनी स्पश्ट केलें.
मान्सूनांत दर्यांत वचपा खातीर बोटींक बंदी घालतात. ताका लागून नुस्तेकार भाव दोन म्हयने वेवसाय बंद दवरतात. जूनाच्यान नुस्तेमारीचेर आशिल्ली बंदी ऑगस्ट म्हयन्यांत काडटले. हे फाटभुंयेर कुटबण जेटी सयत दक्षीण गोंयच्या विवीध दर्यादेगांचेर नुस्तेकारांची धांवपळ सुरू जाल्या. कुटबण जेटी वयल्या कांय बोटींचेर कामगार दोन म्हयन्यांच्या काळा उपरांत परत जेटीचेर दाखल जाल्यात. कांय जाण येवपाचे आसात. नुस्तेमारी बंदी जाहीर जाले उपरांत बोटी वयले कामगार झारखंड, बिहार, उत्तर प्रदेश, ओडिशा अशा तांच्या मूळ गांवांत गेल्ले, ते आतां परत येवपाक लागल्यात. कुटबणचे बोटींचेर सांठवण करून दवरप, कामगारांक गरजेच्या सामानाची पुरवण करप, जेवण करपाक आयदनां, गरजेचे कपडे आनी हेर सुविधांची पुरवण करप, तशेंच बोटीं वयलीं जाळी सांबाळपाच्या, दुरुस्तीच्या कामाक वेग आयला.
बाणावले दर्यादेगेचेर परंपरीक बोट धनयांनी बिरेस्तारा बोटींची पुजा केली. ह्या वेळार पाद्रींनी ह्या मोसमांत नुस्तेकारांक बरें नुस्तें मेळचें आनी कांयच वायट घडचें न्हय हे खातीर प्रार्थना केली.
बाणावले दर्यादेगेर नुस्तेकार पेले हांणी दिल्ले म्हायती प्रमाण, गोंयांत अजून नेटाचो पावस चालू आशिल्ल्यान दर्याय खवदळिल्लो आसा. ताका लागून ऑगस्टांत मोसमाक सुरवात जाले उपरांतूय हवामानाचो अदमास घेवन फुडल्या सप्तकभरांत दर्यांत बोटी घालतले. मात हवामान बरें आसल्यार ऑगस्टाचे पंद्रशे मेरेन सगळ्यो बोटी दर्यांत वतल्यो. सध्या बोटकारांनी जाळ्यांचो सांबाळ, दुरुस्ती केल्या. बोटी दर्यांत व्हरपा खातीर तयार केल्यात. तशेंच गरजेची सगळी तयारीय केल्या, अशें तांणी स्पश्ट केलें. दोन म्हयन्यांच्यान गोंयकारांक फ्रिजांत सांठोवन दवरिल्लें नुस्तें खावन दीस काडचे पडटात. आतां ताज्जें नुस्तें खावपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
