भांगरभूंय | प्रतिनिधी
मडगांवः बाणावली दर्यादेगेर व्हड संख्येन मेल्ले सीगल सांपडले. हे विशीं नुस्तेमार पेले हांचे कडेन वासपूस केली, तेन्ना तांणी सांगलें, बाणावली दर्यांत मेल्ले सीगल दिसताले, ते आतां व्हांवून दर्यादेगेर येवपाक लागल्यात. हें कित्याक लागून जालें हाची म्हायती राज्य सरकार आनी रान विभागा कडल्यान घेवची, अशीय मागणी केली.
कोलव्यां दर्यादेगेर शुक्रारा सकाळीं डॉल्फीन नुस्तें मेल्ले अवस्थेंत व्हांवून आयिल्ल्याची घडणूक घडिल्ली. कोलव्यां उपरांत आतां बाणावली दर्यादेगेर सीगल हीं दर्यादेगेर दिसपीं सुकणीं मेल्ले अवस्थेंत दर्याच्या उदका वांगडा व्हांवून आयिल्ल्याचें दिसतां. दर्यादेगेर भोंवपी हीं सीगल सुकणीं दर्यादेगेंची सोबाय वाडयतात. आतां सकाळच्यान दर्यांत कांय सुकणीं मेल्ले दशेंत व्हांवून आयिल्ल्याचें दिसलां. सुमार 30 सुकणीं दर्यादेगेर व्हांवून आयल्यांत. इतल्या व्हड प्रमाणांत सीगल मरपा फाटलें कसलेंच कारण दिसना. हाचो सोद सरकारान घेवचो. पर्यावरणांत म्हत्वाचो घटक आशिल्ल्या ह्या सीगल सुकण्यांच्या संवर्धना खातीर यत्न करचे, अशी मागणी पेले हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
