भांगरभूंय | प्रतिनिधी
मडगांव : बाणावली दर्यादेग वाठारांतल्या युवर स्टोरी ह्या रेस्टॉरंण्टा सयत कोलवाचें फिशलॅण्ड, गॅलेरिया आनी एम बीच रिसॉर्ट ह्या आस्थापनांचेर कारवाय केली. वेपार परवानो, उजो पालोवपी दळाचो परवानो वा हेर परवानगी नाशिल्ल्यान जिल्हो प्रशासना कडल्यान काडिल्ले समितीन तीं आस्थापनां सील करपाची कारवाय केली.
जिल्हो प्रशासना कडल्यान केल्ल्या सर्वेक्षणांत दर्यादेग वाठारांत खूबश्या रॅस्टोरंण्टां कडेन वेपार परवानो, उजो पालोवपी दळाचो परवानो तशेंच प्रदुशण आनी हेर खात्यां कडल्यान गरजेचे परवाने नाशिल्ल्याचें दिसून आयिल्लें. बिरेस्तारा सकाळीं जिल्हो प्रशासनाच्या आदेशा उपरांत अधिकारी रोहीत कदम हांच्या फुडारपणा खालच्या पंगडान बाणावलेच्या युवर स्टोरी हें बेकायदो तरेन चलपी रॅस्टोरंण्ट सील केलें.
ह्या वेळार कदम हांणी सांगलें, युवर स्टोरी ह्या रेस्टॉरंण्टा कडेन वेपार करचे खातीर गरजेचो परवानो नाशिल्लो. ते भायर उजो पालोवपी दळा कडल्यान परवानो घेवंक ना वा हेर खंयचेच परवाने नाशिल्ल्याचें दिसून आयलें. ते प्रमाण आतां हें रेस्टॉरंण्ट सील केलां. तांकां गरजेचे परवानग्यो घेवचे खातीर संबंदीत अधिकारिणा कडेन अर्ज सादर करपाच्यो सुचोवण्यो केल्यात, अशेंय तांणी सांगलें. ते उपरांत जिल्हो प्रशासना कडल्यान स्थापन केल्ल्या हेर समितीं कडल्यान कोलवांतल्या फिशलॅण्ड, गॅलेरिया आनी एम बीच रिसॉर्ट ह्या रेस्टॉरंण्टांचेर लेगीत कारवाय करून हीं आस्थापनां सील केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
