भांगरभूंय | प्रतिनिधी
जि. पं. पोटवेंचणुकेंत जोसेफ पिमेंता जिखलो
भांगरभूंय | प्रतिनिधी
मडगांवः बाणावले जिल्लो पंचायत पोटवेंचणुकेंत आम आदमी पक्षाचे उमेदवार जोसेफ पिमेंता जिखले. इंडि आघाडीन पिमेंता हांकां तेंको दिल्लो.
आम आदमी पक्ष आनी आमदार व्हेंझी व्हिएगस हांणी मतदारसंघांत केल्ल्या वावराचो फायदो उमेदवार जोसेफ पिमेंताक जाल्ल्याचो दिसून आयलें. पयले फेरयेंत 2788 मतांची मेजणी जाली. तातूंत 21 अवैध मतां मेळ्ळीं. जोसेफ पिमेंताक 1374 मतां, ग्रेफीन्स फर्नांडीसाक 1015, रॉयला फर्नांडीसाक 323 आनी फ्रँक फर्नांडीसाक 55 मतां मेळ्ळीं.
दुसरे फेरयेंत 2650 मतांची मेजणी जाली. हातूंत 24 अवैध मतां आशिल्लीं. जोसेफ पिमेंता 1267, ग्रेफीन्स फर्नांडीस 883, रॉयला फर्नांडीस 441 आनी फ्रँक फर्नांडीस हांकां 35 मतां मेळ्ळीं. हे फेरये उपरांत पिमेंता हांकां 843 मतांची आघाडी मेळ्ळी.
तिसरें फेरयेंत 2935 मतांची मेजणी जाली. हातूंत 25 अवैध मतां आशिल्लीं. जोसेफ पिमेंता 1508, ग्रेफीन्स फर्नांडीस 456, रॉयला फर्नांडीस 781 आनी फ्रँक फर्नांडीस हांकां 165 मतां मेळ्ळीं. हे फेरये उपरांत पिमेंता हांकां 1795 मतांची आघाडी मेळ्ळी.
चवथे फेरयेंत 2119 मतांची मेजणी जाली. हातूंत 11 अवैध मतां आशिल्लीं. जोसेफ पिमेंता 1523, ग्रेफीन्स फर्नांडीस 269, रॉयला फर्नांडीस 295 आनी फ्रँक फर्नांडीस हांकां 21 मतां मेळ्ळीं.
मत मेजणे उपरांत फ्रँक फर्नांडीस हांकां 276 मतां, ग्रेफीन्स फर्नांडीस 2623, जोसेफ पिमेंता 5612, रॉयला फर्नांडीस 1840 मतां मेळ्ळीं. वट्ट 10492 मतांतलीं 81 मतां अवैध थारलीं जाल्यार 10411 मतां वैध थारलीं. आनी पिमेंता हांकां 3049 मतांनी जैत मेळ्ळें.
आघाडेंत कोणाक तरी त्याग करचोच पडटाः पालेकार
लोकसभा वेंचणुके वेळार आम आदमी पक्षान त्याग केलो जाल्यार जिव्हो पंचायत वेंचणुकेंत काँग्रेस आनी हेर पक्षांनी त्याग केलो. हे मुखार गोंयांत ज्यो वेंचणुको इंडी आघाडी लडटली तातूंत कोणाक ना कोणाक एक पावस फाटीं सरचें पडटलें. त्याग करूंक ना जाल्यार गोंय वाटावपाचो मुद्दो फाटीं पडटलो आनी तिसऱ्याचोच फायदो जातलो. पक्षां मदल्या मतभेदांक लागून जावपी मत विभागणेक लागून भाजप जिखत आयला. ताका लागून गोंयच्या फुडारा खातीर आप सयत काँग्रेस, गोवा फॉरवर्ड आनी आघाडेंतल्या सगळ्या पक्षांच्या कार्यकर्त्यांक ही गजाल समजुपाची गरज आसा, अशें मत आम आदमी पक्षाचे संयोजक अमीत पालेकार हांणी उक्तायलें.
इंडी आघाडेच्या यत्नांक लागून जैतः पिमेंता
हेंझेल फर्नांडीस हांणी बाणावले जी कामां सुरू केल्यात, तीं कामां फुडें व्हरतलों आनी बाणावलीची उदरगत करतलों. लोकांनी दिल्ल्या तेंक्याचेर आनी इंडी आघाडेच्या यत्नांक लागून हें जैत मेळ्ळां, अशें जोसेफ पिमेंता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
